期指觀瀾：應對上落市戒急用忍

昨日期指以22,920點接近全日低位開出後，內地數據曝光，十一月期指挾到23,260點方見停步。十時至三時半的中盤時段，期指窄幅上落，在23,190至23,286點之間浮沉，直到臨收市見冚倉盤把期指最低推到23,151點，但低位見支持下，日市以23,225點結束，高水78點。

日線圖上，恒指又返到貼近10日線阻力23,274點附近，周一穿位唔肯跌，周二趁內地數據發圍，昨日的低位拗腰，顯示港股短期內脫離上落市悶局的機會已減低。現時又返回九月中旬開始高低波幅的中間水平，無論大家站在好友或淡友陣營，也都得從頭諗過再作部署。

前日現貨穿底小試牛刀，三分之一注碼開淡倉，周一期指在數據後攻上23,102點觸及既定止蝕位，無險可守只能放低學費，先止蝕離場。這次上落市將進入兩個月，筆者的建議依然是戒急用忍，要入市都唔好同佢搏命，下下試拳，淨係輸點數都死得。

John Mullen