十月是股災月，這句說話到底有無應驗呢？好明顯沒有。大約於十月初，我受訪時多次強調：「幾次的股災都發生於十月」同「所有的十月都有股災」真是差之毫釐，謬以千里！「some As are B」同「all Bs are A」，好明顯是兩回事嚟啦，唔係以為一樣呀嘛？！講驚嚇？今個月驚嚇得多！
我於上周接受《東網》訪問並於自己的facebook做直播的時候都講，要於今個月裏頭劏死牛，就要靠特朗普當選喇！上個月二十一日，我曾於本欄提醒大家，雖然希拉妮於公開辯論中全取三分，大演帽子戲法，但粉絲們咪坐定粒六呀，不確定性還陸續有來！《維基解密》的阿桑奇曾經拍心口講過，要於大選之前將希拉妮打殘，結果，佢都算是講得出做得到呀！
有報道指，希拉妮於三場辯論中對答如流，將特朗普打到七個一皮的原因是：她老人家一早已從民主黨全國委員會臨時主席布拉齊爾的手上接過試卷！
假如屬實，臨場的表現贏對手一條街就梗啦，但就弊在勝之不武啫！
不過，天網恢恢，美國聯邦調查局於周末前便宣布取得了搜查令，就希拉妮果65萬封機密但係周圍擺，有啲仲唔見咗的電郵展開調查。
話就話調查結果要到大選後才公布啫，但結果一旦是負面，希拉妮會不會成為美國史上最快被彈劾的總統？
到時若特朗普當選喇，華爾街就會大嗌話係黑天鵝；假如唔當選喇，特朗普佢老人家又唔接受賽果！亂成咁，太早做好真係唔值博！
富昌金融研究部總監 譚朗蔚（作者為註冊持牌人士）