絲絲講場：花旗盧韋柏呃Like做善事

對年輕人嚟講，上facebook出post呃Like係話都無咁易嘅事，但花旗集團香港及澳門區行長盧韋柏（Weber）尋日出席活動時，就同班後生仔講，千祈唔好睇小呢個舉動，其實輕輕喺facebook一click，對整個社會已經好有幫助。

咁神奇？原來花旗由二○一○年起，每年暑假都會安排大學商科生去社企做義工，每人至少要做160小時，用學到嘅商界知識同技巧幫社企建立形象，等多啲人認識社企同佢哋嘅意念。社企作風一向比較務實，有班後生仔畀啲創意幫吓手，效果應該相當唔錯，希望同學仔完咗計劃都繼續做義工，幫社會出一分力啦！

余絲韻