絲絲講場：中糧肉食首掛 散戶輸入肉
天有不測風雲，唔只搭飛機要睇天氣，連招股都要！昨日上市嘅中糧肉食（01610）貴為央企中糧集團子公司，但招股反應麻麻哋，點解？
中糧肉食董事長馬建平冇賴地硬，不過就賴個天：「招股三天半，一天遇着香港黑雨，一天遇着八號風球，對招股表現有一定影響」，計落得番一日半招股，又真係慘啲嘅。
股價「潛水」17%
唔知關唔關招股事，中糧肉食昨日首掛表現都無乜肉食，股價「潛水」17%，收報1.66元，唔計手續費，每手要蝕340蚊。
不過唔緊要，公司背後仲有中糧集團呢個大貴人照住，中糧肉食貴為集團第10家上市公司，上市就請到集團董事長嘅趙雙連孖住馬建平敲鑼！
趙總現身敲鑼
趙總就話，中糧肉食唔係第10家，而係第11家，因為同中房重組之後多咗1家咁話。
咁嚟緊仲有無中糧旗下公司上市？趙總話一定有！希望再有子公司來港上市，唔好再橫風橫雨，影響招股就唔好啦。
余絲韻