絲絲講場：扮Note 7爆炸樣 iPhone機貼堅•商機

今次呢個抽水概念，創意嚟講絕對頂級；但喺人哋傷口上撒鹽，刻薄都算係極至。連一向最講求回報嘅華爾街中人，對於今次呢份賺錢智慧，都邊讚聰明又邊搖頭嘆息。

絲絲Check過，呢個叫做Explo-Sung嘅惡搞iPhone機貼，依家喺美國網上接受預訂，賣24.99美元（即是差不多成港紙兩舊水），聽講最快十一月初先會有貨。

既然未有貨，又既然係財路，短期會唔會喺Kickstarter或Indiegogo見到有人抄橋呢？手機貼既然有人搞咗，咁手機殼呢？話唔定今晚睇完呢篇文，聽日內地已經有人生產，下周有貨到先達添！

出足全名小心侵權

想抽水賺一筆？咪話絲絲唔提你，若惡搞到底，唔理你機貼定機殼，點都要有番個Logo先似樣。驚被人告侵犯Logo版權？Well，部機爆完溶咁啲，自然唔見咗幾個字母，剩番「SAM」或「SUNG」，咩嚟嘅呢？（絲絲仲特別請咗設計達人姐姐示範畀你睇）

余絲韻