絲絲講場：東橫INN發債客多利息多

去過日本旅遊，熟路嘅，實識JR站附近總有一間喺左近嘅東橫INN（Toyoko Inn）。呢度係財經版，絲絲當然唔係講點Book嚟住，今次係講投資，事關聽講呢個連鎖酒店集團將公開發行債券。

東橫INN計劃發行一批5年期、金額4.95億日圓（約3,744萬港元）嘅債券，呢批債券嘅特色係，回報同下月初喺東京東久留米新開嗰間東橫INN嘅入住率掛鈎。批債券係浮息嘅（即是息率會變），如果入住率高啲，利息就會高啲。批債券喺二○二一年到期，換言之跨越二○二○年東京奧運，即是賭埋到時佢哋吸到幾多客。

聽講，入住率有60%就有年息1厘；入住率達全國平均水平（69.5%），年息升至3.5厘；倘入住率達100%，投資者就有如中Jackpot可獲5.5厘回報。對於日日對住負利率嘅日本投資者嚟講，都相當吸引；至於東橫INN本身就被日本評級機構給予BBB信貸評級，為投資級別中第2最低。

查實呢種與入住率掛鈎嘅債券，佢哋內部早已推廣咗近10年，屬少數員工嘅「福利」，只不過明年首次公開畀公眾認購咁，仲話會喺酒店房同走廊貼Poster宣傳。去開不妨望望。

余絲韻