絲絲講場：支付寶HK開檔「脫腳」
近期手機支付爆商戰。本地薑TNG推兌換外幣功能，遇着日圓、英鎊閃崩如有東風；WeChat Pay就不斷推回贈吸客，最新拍住星展香港信用卡送50元。支付寶今個星期亦出招迎戰推出「支付寶HK」，點知一出手就撻Q，喺facebook畀忠實粉絲圍插，變咗場公關災難。
硬食1.5%手續費
話說「支付寶HK」，大家都期待已久，事關香港人以後用支付寶HK嚟淘寶，唔使再畀手續費。咁大件事，用戶一收到風梗係即刻安裝，諗住支持吓新安排。一班粉絲率先充值支付寶HK，滿心歡喜想體驗淘寶免手續費，點知中伏，喺淘寶網試極都畀唔到錢，個個幾咁失望，搞到個官方Page洗晒版怨氣十足，公關撲火都撲唔切！
絲絲同樣一大早排隊去充值，結果掃晒興，最後要用番PPS畀錢，手續費1.5%要硬食！今次得個教訓，做人唔好咁心急，以免先行先中伏。雖則絲絲依家喺支付寶HK入面啲錢都未用得住，不過支付寶咁大間公司，仲拎埋香港儲值支付工具牌照，絲絲相信佢哋絕對唔會走數嘅。
公道講句，支付寶都確實派出大量人手撲火，唔單止搶修支付系統，仲逐一回覆網民留言。到尋日下晝，電腦版支付寶HK已經恢復正常，而手機版嘅問題個案都大幅減少，呢場公關災難都算叫做解決。
唔支援直送合併
絲絲提提大家，淘寶直送、合併支付同含運費險嘅交易暫時用唔到支付寶HK，不過佢哋話近期會隨住服務升級而陸續上線；至於其餘交易，睇在免手續費份上，絲絲等過兩日系統穩定啲，會再畀次機會佢哋。
余絲韻