Market Insight：汽車股最緊要識揀

大市氣氛轉差，惟仍不乏炒作主題，中國聯通（00762）母企擬引入混合所有制改革，獲多間券商看好，股價收市彈高5.6%；中資汽車股、豬肉股以及彩票股均逆市炒高。今年「金九銀十」遭遇政策冷鋒，在十一假期前後，已先後有21個城市出手調控為樓市降溫，內房股首當其衝成為沽貨對象，昨日連同金融股、本港地產股齊齊拖低大市。

事實上，在環球低息環境下，內地未來仍有減息降準的可能，且人仔持續貶值，手持現金成本愈來愈高，資金苦無出路，依家連買樓都要受限，近日開始有券商唱好資金由樓市重返股市。

大行唱好建滔孖寶

另外，人仔已順利「入籃」，國務院近日話要鼓勵股本投資，北大人隻「有形之手」有機會由貨幣政策轉移至股市，而滬綜指於3,000點附近徘徊逾八個月，跑輸同期其他亞洲股市表現，在資金回流憧憬下，A股短線有一定追落後空間。

港股經過第三季的反彈浪，市場投資氣氛有逆轉迹象，資金由防守力強的高息股，換貨至估值低兼有盈利復甦憧憬的落後板塊，石油相關股、煤炭、水泥及鋼鐵股相繼受捧，周期性材料股包括紙業、塑管、化工及積層板股亦都靜靜起動，當中可留意吓建滔孖寶。

建滔化工（00148）上半年純利按年升七成，至15.06億元，而建滔積層板（01888）中期亦多賺35%，至8.4億元，業績增長均理想。事實上，個人電腦需求復甦、新興行業如汽車、LED燈及健康護理等均令覆銅面板需求上升。早前摩根大通亦發表報告看好其產品需求強勁，分別予兩股「增持」評級，目標價上調至32元及8.6元。

兩股現價往績市盈率僅約14倍及18倍，估值仍有吸引力，而股價經過早前急升後，近日主要於高位整固，交投有轉活迹象，上升動力增強，在基本因素支持下，料股價短線有條件再衝多浪，不妨逢低收集。

昨日大市向下，汽車股表現卻相當突出，主要由吉利汽車（00175）及長城汽車（02333）的九月銷售數據帶動，兩股分別升5.3%及2.2%。另廣汽集團（02238）及東風集團（00489）升4.2%及0.2%。

吉汽領放一再破頂

長汽九月汽車總銷量9.77萬輛，同比增長近五成；吉汽九月總銷量更創歷史新高的7.65萬輛，增82%。自去年中央推出汽車購置稅減免之後，成個市場的確旺咗好多，特別係SUV市場。即使出口疲弱，靠內需仍能夠支撐行業發展，汽車銷售亦成為內地消費品零售總額增長的主要動力之一。

今年以嚟，各車企為搶佔市場，都不斷推出新車款，銷量增長之餘，同時有助提升集團毛利。不過，早前有大行預計，由於基數高關係，明年車企的毛利率或會受壓。

以目前情況睇，購置稅減免將喺年底完結，暫時未知係咪延長，但估計有唔少人會「趕上車」，相信第四季銷量仍理想。

論走勢，一眾車股表現參差，吉汽強勢持續，昨日又再破頂；廣汽由一月低位6.16元計，至今累升七成三。北汽及長汽七月初開始追落後，惟長汽升咗一個月，之後一直喺7.2至7.6元區間上落，未能突破阻力。雖然話汽車股有機會升多浸，但選股同樣重要。

古勝