穿越時空嘅情節一向有市場，估唔到積金局首度登場嘅幼兒理財故事動畫系列《積金時光機》都用呢條橋，教學童認識「儲蓄」、「消費」及「捐獻」基本理財概念，仲為未來強積金計劃主人翁創建全新網上學習平台。
絲絲好捧場睇晒呢段動漫，故事講一對來自未來電子貨幣嘅孝順仔女，收到媽咪嘅實體貨幣收藏品，即興決定借花敬佛穿越過去，用嚟買媽咪最愛嘅兒時小吃「缽仔糕」，玩驚喜賀媽咪生日。不過，呢對咁有心嘅仔女，最終反而選擇送另一份更有意義嘅禮物……想知係乜？自己上網睇啦。
積金局仲搞埋網上家長專區，教親子理財，完全係向細路埋手，果然細路幾時都係市場！
余絲韻