絲絲講場：中銀人壽老總血壓有啲高喎！
中銀人壽第一間客戶服務中心尋日喺銅鑼灣正式開幕，仲喺正中國銀行香港（02388）波斯富街分行隔籬，主打一站式銀行同保險服務。
客服中心提供體檢
有時投保壽險同危疾險保險公司都會要求客戶先驗身，中銀人壽執行總裁老建榮（Terry）話，中心提供體檢服務，不定期有護士駐場，如果客戶喺朝早十點之前完成檢查，基本上即日可以知道結果，客戶唔使心思思。
講完，Terry仲除埋西裝褸，即時「表演」量血壓，結果上壓有成150mmHg！咦，好似有啲高喎？其實Terry平時係有做開運動嘅，相信係佢剪綵期間行行走走，又第一次喺幾十人面前量血壓，所以有啲緊張啫！
余絲韻