絲絲講場：上商郭錫志Like貼地茶記
上海商業銀行個私家廚房嘅上海菜出名好食，但上商中環新大樓要到十月底先正式開幕，估計要年底傳媒界先有機會去新廚房見識。上商行政總裁郭錫志就話自己閒時都鍾意周圍去搵嘢食，仲話平民茶記勝在快、靚、正，絕對拍得住高級餐廳。
呻黑松露慘變樹皮
郭生仲分享有次去意大利餐廳食黑松露Pizza，當時郭生就話塊Pizza太多黑松露，但唔夠油分平衡番，搞到好似食樹皮咁。
另外，啱啱四月上任嘅上商董事長李慶言，尋日上商業績午餐會都有亮相。李慶言來頭仲相當架勢，除咗係上商董事長，亦係新加坡航空主席、大馬紡織投資（私人）常務董事同中國石油天然氣集團嘅董事。
余絲韻