由細到大成日聽人話「日活院線徹底淫賤」，又話30蚊「老友鬼鬼 全日任睇」，而戲名更係改得抵死啜核。不過家陣想睇都冇計……錯！嚟緊11月香港亞洲電影節為紀念日活電影45周年，上映多套上世紀70年代經典「日活羅曼色情電影」（Nikkatsu Roman Porno），以及新拍攝嘅日活作品。即刻睇以下有份上映嘅呢幾套，有幾咁經典啦！
《濕濡的戀人》被日本《電影旬報》稱為上世紀日本電影代表作之一。呢套喺1973年由日活已故名導神代辰巳執導嘅作品，貫徹佢一直透過色情電影，探討深刻問題嘅作風。故事講述70年代嘅日本青年克，離鄉流浪5年，回鄉後喺一間戲院打工，卻刻意隱瞞自己身份同過去流浪嘅經歷。一場暴風雨，佢搭上戲院老闆娘，但生活仍無改變。此時，佢遇到奔放情侶光夫同洋子，並被洋子追求新鮮刺激嘅個性所吸引。情慾交錯間，佢哋嘅人生又會有乜變化呢？
上映日期：11月2及10日
時間：7:50pm
由喺1981年拍攝著名日本電影《水手服與機關槍》嘅名導相米慎二執導，喺1985年8月3日於日本公映嘅《愛情酒店》，戲名好浪漫，事實卻係另一回事。作為「Angel Guts」支線系列（同主線系列主角名字一樣，卻一啲關係都冇）嘅其中一套作品，相對同系列作更着重凸顯人性深層次嘅絕望。男主角村木哲郎人到中年生意失敗，老婆被嚟收數嘅黑幫強暴。絕望嘅佢電召女郎名美上門服務，事後逼女方一同尋死，結果事敗而逃。三年後，做咗的士司機嘅村木哲郎重遇名美，只見女方獨自走到岸邊企圖了結生命。同是天涯淪落人，未知兩人能否擦出人生希望。
上映日期：11月4及13日
時間：7:40pm
由日活著名導演曾根中生喺1979年執導嘅作品《赤之教室》，係「Angel Guts」主線系列嘅第二套作品。講述喺一間小型私人影院內，一班男人正流晒口水睇緊一套學院強暴鹹片，其中鹹濕雜誌老闆村木哲郎被女主角土屋名美嘅悲情打動，於是四處尋覓對方嘅芳蹤，結果喺一間旅館發現女方任職接待員，名美坦言鹹片中嘅強暴場面都係真事，因而令佢自暴自棄，喺村木真誠嘅愛打動下，相約翌日見面，點知村木冇現身。三年後兩人重遇，卻早已物是人非。電影中嘅「性」並非慾望，而係悲情之中嘅一種麻醉藥，當中更夾有對社會嘅嘲諷。
上映日期：11月6日
時間：2:00pm
上映日期：11月9日
時間：7:50pm
如果覺得添布頓（Tim Burton）嘅電影夠奇情的話，呢套由田中登喺1976年執導嘅色情電影《江戶川亂步獵奇館》，同樣夠晒奇情。作為《江戶川亂步全集》系列其中一部作品，以展現人性陰暗面為中心，透過角色殘忍、放縱同慾望，帶出出人意表嘅結局。故事發生喺上世紀20年代，東京一幢破舊公寓內，男租客鄉田三郎經常潛伏喺屋脊，透過天花板窺探其他租客嘅生活。有一次，佢偷睇到公寓女主人清宮美那子謀殺其中一位租客，興奮之餘更令佢愛上對方。為咗討好女方，佢策劃一系列謀殺事件。扭曲嘅人性、愛情同慾望，令到呢套色情電影充滿詭異感。
上映日期：11月5及7日
時間：7:50pm
日活株式會社係由1912年成立嘅「日本活動寫真株式會社」演變而成，亦係現今日本五大電影公司之一。二戰後嘅日活以拍攝動作片為主，其後因電影市場萎縮，於是將動作片加上浪漫色情，打造全新片種「日活羅曼色情電影」。自1971年開始，日活電影以低成本製作，不但令電影事業重現生機，更形成一種與別不同嘅色情加深刻話題風格。如果想再了解多啲日活色情電影嘅深層含義，由香港亞洲電影節舉行嘅「日活羅曼色情電影45周年座談會」，可以帶領大家以非色情眼光，欣賞呢個色慾世界。
日期：11月6日
時間：5:00pm
地點：百老匯電影中心一樓
撰文：魂