絲絲講場：股神公司賣勞保惹官非
未到萬聖節，股神巴菲特已經畀人話佢做咗吸血鬼。何解呢？皆因巴菲特間旗艦公司巴郡旗下保險公司Applied Underwriters兩個星期之前喺美國被速遞公司Breakaway Courier Systems告，仲索償1,800萬美元（約1.4億港元）。
勞保變咗貴價保上保？
間速遞公司有成300個員工，公司話幫襯保險公司諗住買個經濟實惠嘅勞工保險，點知變咗貴價嘅保上保……指控一大堆，仲話成件事直頭係個「龐氏騙局」。
「龐氏騙局」者，即係層壓式做法，靠不停有新投資者加入畀錢，以支付上線嘅投資者，加入者愈來愈多，到錢唔夠畀上線時，就會爆煲（仲唔明嘅自己上網搵！）
似「龐氏騙局」？遭索億四
勞保點同「龐氏騙局」有關？間速遞公司話「保上保」令啲員工互相Cover啲損失，若太多員工受傷索償時就會出問題。實情到底係點？絲絲唔知喎，都未開庭審，但已知索償額就高達1.4億港元。
股神巴菲特向來係全球公認嘅世界第一號慈善家，佢慳自己，但一到捐公益就好闊佬，直頭係成副身家咁捐，年年將巴郡股份捐去老友蓋茨個慈善基金度已成慣例。
今回股神疑似做咗無良吸血鬼，唔知佢有冇個心Un住Un住呢？仲有，佢出名唔干預旗下公司運作，你估佢今次會唔會主動睇睇咩事呢可。
余絲韻