孖妹S檔案：財圈fb超想像
臉書（facebook）造就唔少網紅，部分人嘅人氣分分鐘勁過明星添！查實，財金界分析投資產品就睇得多，但大家又有冇留意過佢哋嘅臉書呢？孖妹本住「至八」精神，平時Look盡全行臉書，發現佢哋除咗專業之外，私底下仲玩得又賺到，不如就搵呢班金融人分享吓佢哋鮮為人知嘅另一面，仲有個人搵銀秘技？
葉：基金公司ETF業務拓展高級副總裁 葉浩文（Kirk）
練好體魄征戰股場
彩兒：平時喺臉書已經睇到你勁多News feed，呃唔少Like，睇嚟中晒臉書毒……今年七月仲開埋個人專頁添，你啲Chok相直情係洗我版！
葉：係？因為我除咗ETF（交易所買賣基金）嘅資訊之外，仲有好多個人嘢，例如係生活態度、興趣、做運動心得、平日所見所聞等同大家分享，例如有時我都會去唔同嘅品牌活動，擴闊社交圈子。近排去咗個設計師嘅婚紗Catwalk Show，我仲做咗次Live添。
Kitty： 金融人出名忙，點解仲可以有咁多細藝？
葉：我Keep住一星期做四至五日運動，包括打兩、三日泰拳，跑4至5次步，每次5至10公里。工作係忙，所以惟有瞓少啲，六點就起身跑o架喇，做運動除咗可以令自己有好體質應付工作之外，仲可以訓練個人紀律同毅力，都係金融工作所需。十月底我會參加10公里賽跑；今年年尾都可能會參加拳賽。
投資要兩金五股三債
彩兒：嘩，你仲要出鏡講投資Tips，一旦打傷咗，啲Fans咪好心痛？
葉：做足保護措施嘅，我最大鑊都係畀人打瘀咗隻眼啫，哈哈！其實今年市況波動，我由年頭起已經同投資者講，投資組合最好放兩成資金喺黃金、五成股票、三成債券去分散風險，呢個都係個人心水投資策略，用ETF分散風險同捕捉唔同市場機會，其中包括黃金ETF、A股ETF、亞洲債券ETF及美股ETF等，個人組合年內升值約10%。
未來一年較看好港股同亞股市場，因為美股估值屢創新高，雖然美國經濟好轉，有加息機會，但亞洲區域喺估值方面吸引好多，顧及A股喺3,000點已經橫行一段時間，在區域中落後，而且參考歷史數據，A股一般喺第四季有唔錯走勢，所以唔少投資者都注視番A股。
黃：金利豐證券研究部執行董事 黃德几（Dickie）
生活直播順便賣樓
Kitty：你個朵叫「財經界黎明」，一睇你臉書就知你係人氣王啦，Update同直播嘅頻密程度勁過唔少歌手，睇你臉書就可以知道股評界嘅最新動態啦！呢排你竟然喺個人臉書賣樓，真係好霸氣！
黃：嗱﹗我已經喺個Post講到明，係「自己樓自己放」、「不是轉行做地產經紀」，係將軍澳嘅個人物業，真係放盤即日已經有人問詳細資料，仲快過經紀啊。
彩兒：我仲睇到上星期三，你直播國農證券董事總經理林家亨因為轉新工而請食飯，仲大爆佢投資賺大錢添。我深深覺得，有直播，真係冇秘密。
內資利好 十月風險增
黃：（哈哈！）其實我係一個好有表演欲嘅人，好鍾意分享平日見到嘅人、事、物，同埋去嘅地方等等。比着喺10年前，一個股評人係寫專欄、去電台同電視台節目面對公眾，但咁樣係唔立體嘅，我嘅興趣好多元化，好開心依家有社交平台畀我分享，如果係平時有留意我嘅人，就可以知得更深入。
不過我好少拍片講投資嘢，有時做咗《東網Money18》訪問，就會直接貼條Link上臉書就算。大市九月上旬升到約24,300點後開始回吐，主因已全面反映內地險資入市嘅利好因素，現時到十月為止不明朗因素漸增，好似地緣政治風險，而受美國總統大選影響，或需等年尾先有機會加息。
另外人民幣十月一日正式納入SDR，人行短期內都唔會減息降準，但發生黑天鵝事件機會提高，大市似乎仍有調整空間，買貨又未夠平，暫時應該觀望住先。
勤力股友做功課指南
若然係勤力股友，對財金資訊極度渴求嘅話，當然就要留意經常上載股經嘅財金專家臉書啦。
Eugene同Alvin勤力到爆炸，基本上日日都會喺臉書講股評或市場資訊，Follow佢哋臉書就唔會執輸啦。
輪后披露另一面
齋睇數字睇到悶，想睇靚女，不妨可以睇吓靚女輪商代表或者女股評人臉書。
Ellie臉書有唔少同卡通人物公仔嘅合相，睇到佢專業以外可愛嘅一面，佢上個月生日，黃德几（圖左）請佢食Lunch之餘，仲有禮物收，呢啲真係女生嘅福利，大家唔恨得咁多。
財子講金又講心
希望喺股票以外，同股評家交心，或者應該睇佢……
Castor選股叻，你同我都知，但你見過佢深情一面未？最近佢就Share咗邰正宵嘅舊歌歌詞，完全睇到佢感性嘅一面。
money.biz@on.cc
彩兒 Kitty