Market Insight：手遊股趁勢炒番轉

除洛玻外，升得最勁幾隻H股有熊貓電子（00553）、京城機電（00187）及昆明機床（00300），要搵共通點，就係基本因素奇差同A股股價大幅高於H股。近期個市，無掛住個「勇」字喺心口，樣樣計過度過的精明股民，恐怕都幾難追得落手。

港股A股化並非新鮮事，在下同個本地基金經理老友吹水，都承認依家南來搵食的內地芬佬，思維邏輯同本地薑好唔同，正所謂If you can't beat them, join them，無辦法用內地玩家的思考角度去睇市，只能選擇退出或者被市場逐漸淘汰。

內地基金有錢任性

最佳例子，是兩隻蘋果概念股瑞聲（02018）及舜宇（02382），當理性的芬佬話15至20倍估值差不多，已經稍高過台灣競爭對手，轉個頭，閂埋門只睇中港市場的內地基金，睇法完全唔一樣，只要屬內地行內龍頭，認為50甚至60倍PE都無問題，最重要人哋堅係錢多，掟到佢郁，你無辦法唔跟！

話說回頭，個市升到癲，愈來愈多淡友加入轉軚，資金也逐漸由重磅分流到二、三線股，TMT股仲有得炒落後的，第一時間想起手遊三寶雲遊（00484）、IGG（00799）及博雅（00434）。若純搵抵炒嚟買，業績好唔好唔理，雲遊同博雅手頭現金及流動資產等同股價四成及四成七，照計死唔得去邊，但三隻得IGG一隻夠秤入到深港通大媽寵幸名單，盲衝古勝會揀佢同博雅。

近年，內地不時提出環保節能相關政策，早前發改委提出要喺七大領域，包括能源、水利及環保等，鼓勵及引民資進入。有數據顯示，舊年各地推出的PPP項目近2,000項，總投資額超過3萬億元人仔，其中以環保項目佔比最大，相關企業有望受惠。

雲南水務止跌回升

很多環保水務股已公布中期業績，大家熟悉的北控水務（00371）及光大國際（00257），純利分別按年上升35%及21%，帶動兩者股價。除咗龍頭股，最近見資金流入中小型股份，昨日天津創環（01065）升近7%，收報4.68元，成交大幅增加。

雲南水務（06839）主業為污水處理同供水，近年密密透過收購壯大業務，今年四月投得哈爾濱辰能工大環保75.5%股權，七月更斥1億美元收購內地水廠50%股權。集團中期收入增逾八成，純利增長七成，前景值得憧憬。雖然績後連跌三日，但於4.3元止跌，目前已收復大部分失地，若交投配合，有望突破上月高位4.85元。

古勝