絲絲講場：領展搞鬼玩「屍囚之路」

領展（00823）搞「屍囚之路」谷人流。你冇睇錯，唔係「絲綢」，而係「屍囚」。為應萬聖節，領展喺樂富廣場起咗條「屍囚之路」出嚟，畀人扮吓喪屍玩逃獄。呢次怕且係領展上市11年來，最重口味一擊！

路上有啲咩？包括「入獄上路」、「陰森重犯監房」、「恐怖大監倉」、「精神病犯奪命監房」、「喪屍控制室」、「血淋淋飯堂」等等咁啦。仲有用人臉檢測科技嘅「驚魂照屍鏡」畀人變身做喪屍，敢唔敢照就你諗你。

十月尾先到萬聖節，依家已經開始「搞鬼」谷消費谷人流，零售業先係最見鬼！

余絲韻