絲絲講場：證券界策動918遊行
上市改革搞到證監會頭都痕，反對勢力乘勝狙擊，密謀再搞「大龍鳳」，喺中環鬧市上街遊行抗議，原本諗住911（本周日）舉行，但由於搞唔切，最快918（下周日）至舉行，仲話最少有千人參與。
反對上市改革
本港11個金融證券業組織今個禮拜二開武林大會，會上有人發起遊行，打算由中區遮打花園行去港交所或證監會。不過各會代表話要返去同會員及董事商量吓先決定。所以係咪搞得成，都仲有變數。
證券及期貨專業總會會長王國安就講到今次改革，話證監會同港交所兩個都「爭唔落」，證監會本身權力已好大，港交所喺上市審批亦好應該嚴格啲，所以佢個人係支持上街，但都要喺下周二例會上問理事。
佢仲話，遊行前可以先搞個簽名運動或者聯署咁，況且遊行一定要夠人數，否則小貓幾十隻，咪自暴其短！
證券商協會副主席陳柏楠就話，該會已表明反對諮詢文件，但用咩形式表達、係咪遊行，仲要同董事會傾，但簽名運動就一定支持。股票分析師協會主席鄧聲興相信呢兩日會有所決定。
余絲韻