絲絲講場：想入投行最忌啡皮鞋

點解？階級歧視囉。啲投行高層精英心態作怪，請人睇出身。個調查發現，有啲投行高層面試時，一見應徵者西裝配對啡皮鞋即Out走，啲高層話西裝配啡皮鞋唔多符合傳統嘅投行專業形象喎。實情邊啲應徵者最易領嘢？咪就係出身平民階層嗰啲，唔係富裕人家，邊曉得咁多「上流社會」潛規則！

注重出身 嚴重歧視

含淚完成幾張Cert，勢估唔到見工時，出身咩家庭、Dress Codes（衣着潛規則）、口音竟然分分鐘重要過能力、資歷與潛質。

調查仲發現，唔理你成績幾出眾，若非名牌大學出身，畀你入到投行都好難上到位。咩叫名牌？就係倫敦大學經濟學院、牛津、劍橋、倫敦帝國學院、華威大學呢幾間。

上面講緊嘅係英國，咁香港點？絲絲問咗位曾任私人銀行高層嘅資深Banker，佢話見銀行工，西裝顏色一般唔係黑、灰、就係藍，配啡皮鞋唔好睇。啡皮鞋要襯番啡色西裝，但淺啡西裝畀人感覺輕佻，深啡西裝就太老成。所以資深Banker話，冇話見工要着咩色鞋，呢個係配搭品味嘅問題。

絲絲諗起位舊友，佢出身屋邨，當年喺香港讀完大學後，專登再去上述名牌大學浸一轉「洗底」，返香港搵投行工，第一件事係先搬離老家，事關求職要寫地址。結果？入咗投行做，今時今日係唔使做嘅少奶奶。

余絲韻