絲絲講場：騰訊總部堅‧離地

騰訊明年啟用全球總部「深圳騰訊濱海大廈」，係幢雙塔式辦公大樓，分別50層及41層。

地皮超細有原因

騰訊市值屬全球科企五大，但總部地皮得1.86公頃，只有2.3個標準足球場咁大，相比阿里杭州總部佔地26公頃，騰訊幅地可謂細得驚人！點解？絲絲聽講，騰訊馬化騰當年為免承擔過大發展風險，所以未敢向政府攞大大幅地申建大大個Campus式總部。

擁空中花園跑道

呢個騰訊新總部雖佔地唔算大，但就乜都有，高科技辦公設備外，仲有空中花園、攀岩中心、連300米跑道都有，唔怪得有人話係科企總部新嘅發展模式，仲係深圳新地標添。

所以話，成功係有原因，冇話一開始就堅離地唔理食唔食得起乜都貪大，抵騰訊畀大行睇好股價會上試300蚊。依家咩位？尋日收報201.8元。

余絲韻