絲絲講場：小米流動錢包改名要小心
小米今年頻頻推新嘢，除咗啱啱上市嘅小米手機Max，同埋小米Notebook、小米手環2等等電子產品外，最新嘅就有利用NFC技術畀錢嘅電子錢包，叫做「Mi Pay」。無錯，係Mi Pay，係冇中文名嘅！如果真係要改中文名要好小心，廣東話千祈唔好叫「米（咪）Pay」或者譯做「米（咪）畀」！唔係就真係倒米嘞！
Mi Pay嚟緊九月就會推出喇。依家小米已經同咗7間內地銀行合作，喺Mi Pay正式推出之前或者會再支援多幾間銀行。而小米5同埋打後推出嘅手機相信都可以支援到Mi Pay嘅。
雖然，現時內地有唔少電子付款平台，例如支付寶，Apple Pay等等，競爭環境認真激烈，但唔代表Mi Pay會冇得發圍，始終小米都係內地其中一間最大嘅智能手機廠商，米粉億億聲計，Mi Pay基本已肯定有一定嘅受眾。如果第日香港推出，又會唔會得米呢？
余絲韻