我哋經常以天使面孔同魔鬼身材嚟形容樣貌身材兼備嘅索女，從而凸顯佢哋外形有幾咁吸引。不過呢啲都係單純形容佢哋嘅外在美，如果講到真正嘅天使化身，不得不提內地模特兒陳天揚，事關佢不但仙氣十足，最重要係佢有一顆善良嘅心，男人點會唔冧吖！
嚟自廣州嘅陳天揚，英文名Sandy，用天使化身嚟形容佢，真係一啲都冇誇張，皆因佢擁有標致五官，加埋清麗脫俗嘅氣質，仙氣十足，簡直係引死人。佢喺寫真中雖然以性感睡衣造型登場，卻唔會令人有低俗感覺，反而係散發出優雅美感。憑住如此動人嘅氣質，令佢喺寫真界獲得極高人氣，同時得到唔少工作機會，以平面模特兒身份喺各類型嘅雜誌亮相，包括時裝、男士、汽車等雜誌，此外，佢更化身足球寶貝喺體育雜誌登場，舉手投足都充滿青春又陽光嘅氣息，甚討人歡喜。有人會問阿妹擁有如此出眾嘅條件，會否朝住更多嘅範疇發展呢？而答案從佢嘅微博中可以得知，佢話：「要麼旅行，要麼讀書，身體和靈魂必須有一個在路上。」意思即係無論做乜嘢，最重要係不斷向前邁進，如果有機會嘅話，佢一定會努力嘗試，做到最好。
猶如天使嘅氣質固然吸引，但從另一個角度嚟睇，氣質呢樣嘢未免太過虛無，加上佢經常喺個人微博中表現出女王嘅霸氣，例如佢曾經向粉絲表示：「不愛我，你確定你能看見明天的太陽？」表面上睇佢好似好惡，查實話個秘密畀大家知，阿妹喺唔使工作嘅日子，就會當義工去到唔同地方幫助有需要嘅人，從兒童中心到偏遠山區，都留下佢唔少嘅足迹。而所謂嘅義工，大家唔好以為佢只係露一露面，喺Facebook打卡及喺微博分享就當做咗義工，佢的確係身體力行，搬搬抬抬兼且落手落腳幫忙，以汗水帶畀對方快樂，好似佢早前就參與一個到山區助學扶貧活動，不但搬咗3個鐘頭物資前往山區嘅小學，又同當地嘅小朋友玩扯大纜，如此既有外形又善心嘅美女，試問點會唔令人神魂顛倒呢？除咗有一顆善良嘅心之外，佢更係個有生意頭腦嘅叻女，現時經營網絡商店，實行以自己作為生招牌勇闖商界，大家係咪覺得阿妹好完美呢？
簡介：除咗外形夠吸引外，內在美更係陳天揚嘅最大吸引力。當然，除咗呢啲地方外，佢對於攝影亦有深入研究，好似早前佢喺微博以圖文並茂嘅方法同大家分享自拍技巧，大家有興趣不妨參考一下。
出生地：廣州
身高：168cm
三圍：33、24、34
撰文：魂