Market Insight：汽車零件股乘勢突圍

大市焦點回到績優股身上，以203元收市新高計，騰訊折合拆細前舊價1,015元，比○四年招股價3.7元，累積升幅是教人咋舌的273倍！PE經已半百倍開外，但追逐新經濟股的賓架反問自己一句：「新經濟概念唔買佢買乜？」已支持大家繼續瘋狂叫價，瑞信睇232元，美銀美林睇238元。查實，當騰訊已比大市平均十一、二倍估值高出數以倍計，40或50倍PE又有何分別呢？

個市由六月底英國脫歐公投爆冷，個市由19,662點炒到上呢個水位，古勝認為已經算超額完成，在深港通通車前四個月，大家倒不如疊埋心水，由今浪表現落後，市值高於50億元的恒指小型股指數成分股中尋寶，話唔定會有意外收穫。

二線內房仲有得去

今年上半年，阿爺為樓市區域降溫，一線城市樓價升勢有放緩迹象，資金轉往二線城市搵食。日前上海土地拍賣，又見三幅地王誕生，成交價遠遠高於預期，可見發展商對一線城市後市睇法還是極為樂觀。講到尾，是睇通阿爺有所顧忌，保經濟的大前提下，對壓抑樓市炒風講多過做的現實。昨日二線內房升得唔錯，料強勢還會延續。

昨日見汽車零件股獲追捧，耐世特（01316）憑亮麗的中期業績突圍，其實呢隻股都靜咗一排，近幾個月主要喺7至8元區間上落，昨日一開市已經抽升三成至9.99元，同時創上市新高，最終收市升28.8%報9.92元。

集團上半年多賺近1.5億美元，按年增54%，收入則增加17%，北美市場仍然係主要收入來源。除咗美國汽車市場回暖，中國汽車銷售上升，亦令集團喺中國市場的收入增長25%。績後有多間大行唱好，主要認為集團可受惠汽車市場復甦，以及其先進駕駛員輔助系統（ADAS）業務的盈利將改善。昨日股價彈高近三成，宜候回調才跟進。

敏實產品毛利較高

另外，敏實集團（00425）昨日同樣創新高，盤中高見28.75元，收市升幅略為收窄，收報28.4元升6%。走勢上，該股喺三月底開始沿10日及20日線向上，一直保持強勢，若業績對辦，後市有機會更上層樓。

敏實主要從事設計及產銷汽車裝飾條、裝飾件、車身結構件等汽車零件，睇番舊年業績，收入及純利均按年升約14%。集團鋁產品多數用於高端車，現時有唔少汽車都改用鋁製產品，業務具發展空間，且毛利較高，有助帶動盈利。集團將於下周二公布中績，不妨小注跟進。

古勝