絲絲講場：兩大偏門預測齊估下周冧市

英分析師貼3驚嚇日

呢位英國金融經紀行Core Spreads嘅首席市場分析師Sandy Jadeja，佢喺六月英國脫歐公投前已經話，無論結果係點，環球股市都唔會點有事，反而到八月先要驚。佢由美國道指嘅循環周期分析得出，嚟緊有三個日子，股市會失驚無神勁Chok，分別係：

1、今年八月二十六日至三十日之間

2、今年九月二十六日

3、今年十月二十日

信唔信好？Jadeja呢十年來就貼中咗四次冧市。○五年佢話美國樓市就快爆煲，八星期後樓市真係冧；舊年七月底佢預警話八月十八日有大單嘢，四日後道指閃跌12.5%！之後佢又叫人睇住九月十四日或十七日，結果道指係嗰段時間8個交易日累挫差不多6%。舊年十月華爾街人人睇牛，佢話今年一月四日會轉熊，結果道指當日勁挫，接連11個交易日狂冧11.2%。

中信里昂：8月24大凶

嗱，絲絲仲記得，中信里昂證券今年年初發表風水指數，列出猴年股樓表現，其中講到八月大凶日係八月二十四日，同樣即係下周！乜咁啱。

都未夠驚。事關Jadeja話，終極大冧市係二○一八年！嗱，Jadeja貼中嘅就四次。眨眼就下星期啦，好快就知準唔準。

余絲韻