金融遊學團：財經公關 勝在好形象
同學們參加《金融遊學團》的活動，如出席公司上市儀式、業績發布會，都見到一班打扮端莊、談吐得體的公關。財經公關除了「睇得」，仲要「打得」，她們八面玲瓏，與上市公司管理層、投資者、股東，甚至傳媒維持關係。究竟她們如何保持個人形象，同時協助上市公司建立良好形象？
高管開源：市有交投 生意唔愁
財經公關有別於其他公關公司，主要負責客戶上市前、後的工作。縱橫財經公關是本地一家較大型的財經公關公司，就讀英國利物浦大學的Ryan、中大Simon、中大Ray及樹仁Paris一踏入公司門口，縱橫公共關係顧問集團助理總監Brenda便已殷勤接待，盡顯親切形象。
同學們先與集團主席曾立基「打招呼」，其房間放滿公司多年獲獎的獎盃，反映公司實力強勁。曾立基指，「要幫上市公司提升形象，我哋都要先為自己建立良好品牌，樹立榜樣。」
他稱，財經公關工作主要分兩大類，第一是為籌備上市的公司將股份向外推廣，向基金經理、投資者等介紹客戶品牌；第二是為公司上市後籌劃業績會、周年大會等活動，增強客戶與投資者的聯繫。另外，公司亦會為銀行、政府等機構做公關，推廣品牌。
接細企Project好賺
了解過財經公關工作，同學們不禁聯想起網絡熱詞「關公災難」，並向主席請教面對「災難」的拆解招式。Ryan問，「上半年股市不穩，投資者信心大減，好多公司唔想喺市況差嘅時候上市，會唔會影響到公關公司嘅生意？」
曾立基回應：「雖市況不穩，但只要搵到賣點，股市仍有交易。如一啲市值較細嘅公司，經濟唔好，急需資金，就會上市集資。雖市況差，但上市公司數目可能仲多，只係集資額較少。」
他又提及，財經公關與投行不同，前者以活動數量計算收入，後者以集資額計算收入，「細公司要搞多啲活動去增加知名度，但國企唔需要做專訪已好多人識，變相公關幫大企業做上市宣傳所賺到嘅錢可能仲少。」
主席又帶同學們在公司內繞場一圈，事實上，寫字樓面積逾2萬呎，劃分多個區域，如負責內地企業和本地上市公司的公關等。在不同區域，同學們都發現一個有趣現象︰女多男少。主席解釋，公司沒有刻意聘請男生或女生，但經過一輪筆試後，男生數目明顯大減，可能與女生語文能力較強有關。
公關女神：Work Life Balance有一套
要深入認識財經公關的工作，同學們跟三位「公關女神」近距離交流，藉此了解她們不為人知的一面。
高級客務經理 Katrina 客戶讚賞 OT無所謂
Q︰公關工作係咪好辛苦？成日都要OT？
A︰我試過最長一次係由朝早九點做到凌晨五點，第二日係要照正常時間返工，但若得到客戶一、兩句嘅讚賞，幾辛苦都值得，滿足感好大。
客務經理Kylie 忙到喊時 飲酒減壓
Q︰大家工作咁忙，平時有咩方法減壓？同事之間會互相扶持？
A︰有時做嘢真係做到好忙，見同事仲多過見屋企人，所以大家感情好好。忙嘅話，大家會留喺公司Pantry入面飲酒減壓，呢度收埋咗好多酒。
客務經理Rita 見客打扮 首重大方
Q︰見到你哋打扮得咁靚，係咪次次都要咁端莊、着高跟鞋？
A︰我見你哋之前，其實喺公司着緊平底鞋。每次出去見客都要大方得體，化妝同高跟鞋係必須。雖工作時間唔穩定，但儀容好重要，所以我會擺定件西裝外套喺公司。