孖妹S檔案：溫斯坦：瀕危公司最筍
憑住超卓嘅交易技巧，喺27歲已經進身德意志銀行董事總經理，喺金融市場做咗多年嘅長勝將軍，○八年時竟一鋪勁蝕140億港元，溫斯坦（Boaz Weinstein）呢位華爾街星級交易員嘅投資歷程，真係充滿戲劇性。現為Saba Capital Management投資總監、管理過百億港元資產嘅佢，今年回報再次大幅跑贏同行，究竟面對市場嘅風起雲湧，佢又靠咩出奇制勝？
對沖基金回報超班
溫：Saba Capital Management創辦人及投資總監 溫斯坦（Boaz Weinstein）
彩兒：根據HFR數據，環球對沖基金今年首7個月整體平均只有3%回報，但你隻信貸對沖基金同期有9%回報，跑贏好多同行喎。
溫：我哋今年表現得好，好大部分係因為捕捉到同一公司嘅債券相對股票錯價嘅獲利機會。喺能源行業，好多公司都因為油價下挫而受巨大衝擊，信貸市場不成比例咁受壓。
你可以見到一啲能源公司嘅債券，跌到去財務有嚴重危機嘅水平，面值一蚊嘅債券只賣兩毫、一毫，甚至係五仙。假設你用15蚊買入面值100蚊嘅債券，年期3年，只要間公司唔執笠，就有機會賺到六倍有多。
當債券價格話你知呢啲公司好大機會執笠，佢哋嘅股份理應唔會值錢，但事實上呢啲公司嘅股份仲值錢。我哋着手搵一啲股票有價值、但債券價格話佢會執笠嘅公司。
亞股指數期權博贏
Kitty：哦，咁即係你會買入呢類公司嘅債券，同時沽空佢哋嘅股票，做資本結構套利。除此之外，你今年又有冇其他贏錢嘅好橋呀？
溫：近期美股市場嘅投資情緖好樂觀，標普500指數波幅唔算好大，至於亞洲股市，好似日經指數同恒生國企指數嘅波幅相對較大，但標普500指數嘅期權，反而貴過亞洲指數嘅期權，所以我哋買咗啲亞洲股票指數期權，博之後亞洲股票指數嘅波幅會繼續大過標普500，價格會上升。
彩兒：英國六月公投脫歐後，環球股市跌咗唔係好耐，就已全面反彈，近期升勢不知幾強，恒指早前創咗今年新高，納指同標指更創咗歷史新高，究竟依家係牛市開端，定係暴風雨前夕呀？我真係好亂呀。
負息債甩手搵傻仔
溫：過去一至兩年，美股以及環球其他股市嘅企業盈利都差強人意，股市理應唔會咁強，股市持續向上嘅原因，係因為債市收益率跌到冇咁滯，投資者將派息嘅股票當咗做債券。
環球股市未來一段時間應較平穩，即使英國脫歐咁大件事，都不足以推冧個市，要股市大跌，需要更重大事件。雖美國將舉行總統大選，但我相信美股未來一段長時間會喺窄幅上落。
Kitty： 股市升，睇番債市，同樣升得好勁吓喎，日本、德國同瑞士嘅十年期國債都已去到負利率水平，目前環球負利率債券總值已達至少10萬億美元，美國十年期國債價格今年以來係咁升，息率由年初約2.2厘，跌到依家得番約1.5厘。
溫：呢個現象都幾嚇人，當你買入負利率債券，唯一可賺錢嘅方法，就係之後有人用更高價錢向你買入，負利率債券有人買，呢個情況可用「博傻理論」（Greater Fool Theory）去解釋。
組合保守 採長短倉
彩兒：咁即係你覺得投資者唔理價值買入呢啲負利率債券，只不過係因為預期之後有個更傻嘅傻瓜接貨。你選擇唔買埋一份做傻瓜，咁你依家又會點部署呀？
溫：我哋依家有啲價格合理嘅日本同美國利率期權，年期方面比較遠，博呢兩個國家利率喺三至四年內上升。
整體嚟講，我哋個投資組合好均衡保守，採取長短倉策略，達致市場中立。雖今年美國市場升咗唔少，但我哋做定好多保護措施，以防信貸市場出現大幅拋售。
彩兒：你見過咁多次金融危機，最深刻又係邊次？
溫：我第一時間諗起嘅事，係○八年雷曼兄弟倒閉當晚，喺聯儲局嘅信貸危機小組，代表德意志銀行進行商討。我九○年代初入行時，就遇上俄羅斯金融危機，每隔幾年，總會發生一啲預計唔到、發覺嘅時候已經太遲嘅事。
溫：當我置身危機，我會覺得驚，但同時亦會覺得有趣。話唔定第時某一日又會有金融風暴，喺個市波動極大時投資嘅經驗或有助我應付呢啲時刻。我啱啱畢業時，仲未有信貸衍生工具指數同信貸期權市場，好慶幸自己可以喺九○年代開始參與信貸市場，見證到一個咁多創新嘅時代。
溫斯坦（Boaz Weinstein）小檔案
現職：Saba Capital Management創辦人及投資總監
管理資產：17億美元（約132.6億港元）
曾任：德意志銀行董事總經理
學歷：密歇根大學哲學學士
若有料報畀彩兒同Kitty或有嘢問，可電郵money.biz@on.cc