上周五美股三大指數雖然個別發展，但純睇中港股市就繼續有景，雖然騰訊（00700）上周五衝上191.5元新高後守唔到收市，最終報187.8元，但近期支撐大市的內銀及內險股則強勢持續，國壽（02628）及平保（02318）均破位而上，睇落好友主力部隊未散場。
恒指上周五再升186點，收報22,766點，除朝向兩萬三關口邁進一步外，最值得留意是主板成交唔經唔覺已增至790億元，是自英國公布脫歐當日後新高，加上50日線已上破250日線，成交配合升勢，中線技術走勢進一步轉強，暗示今轉升浪或者仲有排行。
期指夜市收報22,741點，微跌16點，未平倉張數維持在12.6萬張，未見異樣。策略上，既然大市有勢，筆者除揸住22,400點開的好倉，以及9,300點開的國期好倉外，周五再以四分一資金於9,500點加開一注國期好倉，跌穿9,400點就走人。
John Mullen