Market Insight：騰訊叩200元無難度

其實，投資市場向來係當大家都對風險高度警剔的時候，危機就暫時唔會出現；反而，當大家都百分百相信後市會繼續牛氣沖天，就會敲響冧市喪鐘，最近的例子係舊年A股狂牛之死。咁到底今次美股狂牛最終點收科？古勝相信有機會撐到美國總統大選前後先至出事，所以唔使急住開淡倉，而落場小注跟炒，亦只宜集中喺高流通量的股份，以免有風暴突襲逃生無門。

講番港股，上周恒指再創今年高位，盛傳會喺「八月份其中一個禮拜五」公布的深港通推出時間表，就仲未見到成事實。上周四相關概念股急升後，周五普遍進行整固，但沽壓未算太大。

事實上，港股通餘額已唔多，盛傳會一併為滬股通批出新額度的深港通，點講都好應該唔會拖太耐，就睇阿爺幾時扑錘！

改革必須與時並進

最近關於上市改革諮詢文件的爭論甚多，主要都係分港交所（00388）同證監會兩大陣營，一個就假想敵話證監會會藉此一權獨大，一個就好似大石責死蟹咁強調建議無Plan B。作為一個資深投資者，老實講在下唔認同世界天天變，但香港上市監管唔可以一成不變，咁樣只會令監管條例脫節，並不利市場發展同保障普羅投資者權益。

從另一角度睇，係咪增加證監會過問上市審批權的權力，就一定會引致一權獨大的問題，甚而會令港股變得一潭死水？睇海外經驗就未必。而事實上，證監會作為一個執法機構，實在毋須攬太多權上身，做死冇獎金！

反而，大家應該平心靜氣坐低諗諗，藉着今次討論香港上市審批架構檢討，點樣改革先至能與時並進，提升香港金融市場競爭力，完善對投資者的保障。

科技板塊氣氛良好

至於從監管的角度，其實兩地市場日趨緊密，港股受A股影響日增，再加上隨着滬港通和即將開通的深港通啟動，內地投資者對港股的參與度有增無減，因應參與群的轉變，單以打開門口做生意的角度來主導上市審批，在規範市場風險方面，確有不足的地方，適時作出檢討和改革亦是無可厚非。希望上市公司又好、券商、經紀、投資者都好，要從大局出發，客觀提出可行建議。

講番個股，藍籌股陸續公布業績，本周焦點輪到騰訊（00700）。市場普遍預期騰訊今年上半年純利介乎202億至219億元人仔，按年升幅介乎33至44%，其中花旗睇目標價220元。其實，早前《Pokémon GO》登場，任天堂股價翻雲覆雨，加上LINE上月中喺日本上市以來，股價表現都唔錯，現價與上市以來高位距離不遠，另九月蘋果公司將推出新iPhone，帶動重估潮並有利科技股的氣氛。若然騰訊中績表現對辦，呢浪股價叩200元大關應無懸念。

古勝