新世代供略：年輕人上車放眼油麻地

香港地方細，生活節奏明快，住近油尖旺區無疑出入會快人一步。今期「新世代供略」主角Kirsten，由細到大對旺角區甚為熟悉，當然不想離開生活圈。若她不介意住舊樓，港鐵油麻地站附近的宜發大廈，衣食住行就腳，啱晒後生仔女，上車價約360萬元。

Kirsten讀設計系，有做兼職Sales，閒時家人會幫她買股票投資，算是有基本的理財觀念。她稱，「本身住旺角，出入太方便，住慣咗呢區又唔覺得好逼，交通配套對我嚟講最重要。如果呢區300幾萬算合理價，住舊樓都無乜所謂。」

宜發大廈一梯兩伙

旺角人口密集，大小商場林立，最繁忙之一的街道彌敦道，每天人車熙來攘往，好不熱鬧。不過，要在該區搵個上車盤，除了居住環境較為擠迫，難免外牆保養差，及空氣會較為污濁。不妨轉移至同樣出入便利的油麻地一帶，鄰近廟街頭段的宜發大廈，僅約1分鐘已到港鐵油麻地站及彌敦道，衣食住行僅咫尺之距，又近旺角及尖沙咀等地，啱晒愛熱鬧的Kirsten。