絲絲講場:馬化騰找數為慈善?

肯「找數」至係真漢子,記唔記得騰訊(00700)主席馬化騰喺今年四月曾經話過,要捐1億股騰訊股票作慈善用途?事隔三個月,大家都以為只聞樓梯響之際,馬化騰就真係「找數」,撥出1億股去佢個慈善基金名下!

日前1億股轉基金持有

聯交所權益披露顯示,馬化騰於七月十一日以每股177蚊嘅價錢「減持」1億股,「接貨者」係「馬化騰環球基金會」,基金跟手於七月十四日沽出兩百萬股騰訊,套現逾3.6億元,按騰訊昨收市價184.8元計,馬化騰捐咗唔止177億港紙!

其實馬化騰一向好少喺七月份就公布業績嘅時分減持股份,根據往績,佢減持嘅月份多數都集中四月同十一月左右,今次一反常態揀七月捐股份,無視減持股份可能帶嚟嘅市場波動;而且之前仲話會分批注入,今次竟然「一炮過」捐晒1億股,果真為善不甘後人。

之但係「馬化騰環球基金會」個名係第一次出現,究竟係乜東東?據之前新聞所講,慈善基金將會支持中國內地為主嘅醫療、教育、環保等公益項目,以及全球前沿科技同埋基礎科學探索。

余絲韻