孖妹S檔案：街坊小炒王 贏錢有段「股」
成日都話香港人係全民皆股，究竟有幾咁「全民」？答案係：梗有一個喺左近！孖妹發覺想搵散戶講股經其實唔使落魚缸，有冇諗過你身邊嘅人，例如係街市嘅菠菜蓮，又或者係茶記老闆張叔都有一身好炒技？你又有冇諗過，連派飯派到出晒名嘅街坊慈善家、深水埗明哥都係平民炒家？
陳：深水埗北河燒臘飯店店主 陳灼明（明哥）
無師自通 會友收風
彩兒：明哥，原來你大大話話都炒咗成14年股，當初係點開始？
陳：○二年嗰陣，有個朋友炒開股，但當時我係完全唔識嘅，佢嗌我一齊抽中銀香港（02388），跟住我咪抽番手，初初都好留意股價，不過佢上市後一年都只係上上落落，咪放係度唔理佢囉，點知後來發覺佢由招股價8.07元升到上10元，有2元賺，所以就放咗喇。我就係呢個時候開始多咗留意股市，不過我唔係成日買賣，同埋都係用個人嘅資金，唔會郁舖頭啲錢，所以都係小注買賣啫。
留意環球政經局勢
陳：我其實一路以嚟都冇上過投資班，主要都係同股友傾股經攞靈感，仲有睇公司業績，同時自己都會分析宏觀市況，睇吓世界各地發生緊乜事，例如有無戰亂啊、英國嗰邊又講緊脫歐啊……其實，環球股市同經濟之間嘅關係千絲萬縷，所以唔可以剩係睇香港新聞㗎。
Kitty：好多股友都會參考股評人貼士做嘢（口架）喎，有啲人仲會聽老婆教路添，你會聽邊個話多啲？
彩兒：你會唔會係鍾意沈大師（訊匯證券行政總裁沈振盈）或者郭Sir（耀才證券市務總監郭思治）啊？嘻嘻！
陳：我唔識邊個係沈大師喎，剩係識得財叔（物業投資專家）咋，因為佢有嚟幫手派飯，其他都唔識㗎；明嫂唔識炒股，但佢都唔會話唔畀我炒嘅，我畀得足家用佢就得㗎喇。
我炒股嘅戰友係舖頭附近嘅凍肉舖老闆，我哋會一齊分析點解股份會急跌啊，佢又會同我講吓大摩唱淡乜股票，見到乜股票有大股東增持或減持，叫我留意番，間中仲會畀貼士我，近期叫我睇友川（01323），但我真係睇唔透，唔會考慮入貨喇。
陳：雖然我忙住搞舖頭啲嘢同派飯，唔得閒成日睇實個市，但係人哋畀貼士我，我都唔會死跟㗎，自己會做分析，近期仲換咗部三星智能電話睇股價添。以前我會親身去銀行排隊落盤嘅，依家銀行搬遠咗，所以轉用電話落啦。
量力而為 瞓身實弊
彩兒：炒咗十幾年，有冇啲難忘嘅炒股經歷？
陳：我點都會記得隻宏霸數碼（00802），兩年前5毫幾子買入，當時係傳緊賣盤，點知後來賣盤唔成，仲先將股份4合1，再1供5，搞到我依家仲蟹緊，冇計喇，諗住放喺床下底就算！
最威水嘅係，上年凍肉舖老闆介紹我買港銀控股（08162），朝早入、下晝出，短短幾粒鐘已經賺咗四成回報。
Kitty：明哥，我知道你做慈善好有心得，咁會唔會有個人炒股哲學？
陳：炒股對於我嚟講係一種娛樂，量力而為就炒得冇壓力，千祈唔好瞓身。講真，唔等錢使先好炒股，炒股有投機賭博成分，股票有上有落，有時遇上帳面微蝕綁死咗，如果係用多餘錢炒，就可以同佢鬥長命。
另外，入市時，我心目中都會設立一個目標價㗎，例如近期喺5.45元買入華能國電（00902），貪佢有0.47元末期息，估計除息前會有反彈，但依家綁死咗，短期內要坐貨喇。
陳：我嘅愛股主要係藍籌股同埋一啲發展潛力股，多數係以區間炒作，留意佢哋多數係乜價位徘徊，然後嘗試喺較低位撈、高位沽，有時股份跌到去52周新低，我都會留意，但唔會亂咁撈（口架），要視乎佢受乜事件影響啦！牛熊證、期指等太高風險，所以我都唔會買。
中廣核電望上五元
彩兒：睇得通下半年市況嗎？有乜心水股？
陳：我估計下半年港股應該會好轉，不過，現時大市仲未有大方向，所以要靜觀其變，人民幣係咪市場化好似仲未明朗，同埋人民幣地位仲未被國際完全認同，現時仲係以美金為主，美國經濟牛皮，估計六月都唔會加息住，所以近半年應未有大變動。
陳：板塊方面，我覺得核電係未來發展大趨勢，加上一帶一路嘅國策，相信第日新興國家亦會搵內地電力公司發展核電，所以係好大嘅潛在商機，國策推行暢順嘅話，估計中廣核電力（01816）有望反彈，未來有機會上望5元。
雖然鐵路股都可以受惠於一帶一路，但顧及有貪腐問題，所以都唔敢掂。另外，中銀香港喺香港人民幣業務清算方面有領導地位，人民幣國際化都靠佢，相信有前景。
Kitty：明哥支鑊剷唔單只炒餸叻，炒股都一樣掂！
M：家庭主婦 馬小姐（Miss Ma）
專攻期權 學習收放
Kitty：你平時得閒飲吓茶、學跳舞，咁有生活質素，邊估到你原來已經深入股壇17年，曾經有過經紀牌，退休前仲喺四大會計師行之一做過添！
M：我四十幾歲就退休，因為有筆多餘錢，加上賣完樓有筆錢喺手，夾埋有四百幾萬本金，所以九九年開始認真炒股，當時中晒散戶一般嘅謬誤，贏少少又唔走、輸得多又死揸，正所謂「贏粒糖、輸間廠」 就係呢挺喇！
我最高峰有三十幾隻股喺手，仲要係跟人畀嘅冧巴入貨，當時黃師傅（輝立証券董事黃瑋傑）都有提過我，揸太多股會管理唔到，但我總係唔信邪，卒之撞正二○○○年科網股爆破，呢一役我輸咗二百幾萬。
唔敢搏盡 有賺快閃
M：其實我九七年讀過MBA課程，自以為好醒，點知書本上嘅理論同現實係兩回事，真係落場炒嗰陣，由初初拎住計數機死計爛計，慢慢就變成靠直覺，點知就出晒事喇！
彩兒：你近七至八年主力玩期權，幫到你收復失地嗎？
M：近年我都係傾向保守，因應市況長期處於大型上落市，走勢橫行，所以期權方面係主力做Sell Put（沽出認沽期權），不過口講就理性，實行時都係成日唔識收手！由一四年尾至舊年大時代，將三百幾萬本金炒到帳面賺到百幾萬，可惜喺大時代後嘅股災又輸番，只可打個和。
M：今年都好難炒，雖然三、四月升市有錢賺，但仍然追唔番一、二月所輸嘅本，我記得港股二月試過有日單日跌800點，好記得新地（00016）期權倉單日輸17萬、18萬，加埋其他倉，一日就輸咗40萬至50萬，好肉痛！今年整體仲輸緊約8萬蚊。
Kitty：希望過咗五窮六絕，你嘅手氣會好啲啦。
M：我心態變咗，一賺到超過2,000蚊會平倉，力爭做快閃黨，現時組合有五成係期權倉、三成係正股，兩成係現金，整體組合投資額約300萬。
國壽中行吸引 心郁郁
M：今個月喺97.5元價位做咗長和（00001）Sell Put，依家帳面輸緊，惟有轉倉再等！大市已處於低水平，無論係國壽（02628）、長和、中行（03988）等都喺吸引水平，見到都身痕想出手！受惠一帶一路國策，中資股業務有望走出去，其中中國海外發展（00688）係我添食首選。
若有料報畀彩兒同Kitty或有嘢問，可電郵money.biz@on.cc
Kitty 彩兒