北水頭等倉：中資券商股吼得過
內地首四月全國規模以上工業企業利潤總額同比增幅較首三月回落0.9個百分點至6.5%，其中八個行業利潤總額同比減少。一年已過三分一，內地經濟仍令人失望，難怪上大人着急！
G7開會，明眼人都睇到矛頭直指「大國」，隨即又傳來美國對寶鋼、首鋼、武鋼及鞍鋼等內地鋼企及其美國分公司共計四十家企業在美銷售的碳鋼與合金鋼產品發起「337調查」，到底係配合美國大選選情而需要擺出的姿態，抑或真係要打貿易戰，就要等着瞧。
六絕市況大上大落
市場唔少評論話，繼五窮完結，六絕在後，六月市況總之有咁淡得咁淡。筆者亦同意，六月份確實有頗多重大不明朗因素存在，但唔一定一面倒利淡，好可能是大上大落，然後等六月底平手做埋基金半年結。雖然唔係咩大升市，但聽到有波幅可炒，對炒家而言，已有久旱逢甘露之感！
基本上，筆者仍用一顆平常心看待深港通，但都要做定兩手準備，若六月大市氣氛有改善，可以留意龍頭中資券商股表現，勝在近月股價已調整，且具流通量有咩風吹草動肯走可以甩到身。
近期海通證券（06837）調整至11至12元水平現承接，若短期續靠穩，可以睇實，北水一來，博再試衝上月高位13.5元水平，下穿10.8元止蝕。
司慕渢