絲絲講場：40年真．老股東 玩謝史樂山
當公司主席遇上認真老股東，會點？搞笑扮風趣都過唔到骨囉。
話說太古地產（01972）尋日股東會，雖然管理層大部分係洋人，但一啲都無阻各位股東發問嘅熱情。
唔滿意酒店業務
有位華人老股東話自己支持咗太古（00019）逾40年，但唔多滿意酒店業務無乜進帳，阿股東伯伯仲建議成立獨立帳目，等酒店管理團隊大啲壓力去做好啲。
股東伯伯都未講完，太地主席史樂山已經插口話：「信我，啲員工喺我管理之下已經相當大壓力」，全場即時爆笑。
想以笑帶過？阿股東伯伯似乎唔受，佢冇放過史樂山，繼續促請阿主席認真考慮。咁點？史樂山惟有嚴肅起嚟，承諾為股東創造價值囉。
船務年代已購股
阿伯伯做晒功課，比較過另一間喺香港同太地差唔多規模嘅酒店集團，但人哋近五年賺大錢，太地酒店就無乜進帳。阿伯伯仲話，自己喺太古仲係主力做船務嘅年代已經揸佢哋股票。
去到呢度，伯伯份誠意幾咁有分量，仲有邊個敢話Feel唔到？史樂山惟有打圓場話，呢個會錄晒音，記錄在案，如有需要可以寄番會議紀錄畀伯伯。
嗱，咪以為小股東淨識問餅卡。仲有，兩人以上交手，全程英語對答。阿伯，堅。
余絲韻