北水頭等倉：復星價值仍被低估

中港股市向好，港股第二日企穩在21,000點樓上，可確認突破。聯想（00992）及國壽（02628）同升逾3%，騰訊（00700）一度高見167.2元，收報165元，升0.3%，相信季內可順利破頂（171元）。

IMF話中國銀行業不良貸款可能已達到GDP的7%，呢個睇法解釋咗為何人行要兵行險着提出債轉股的做法，這樣才能快速「掩飾」負債問題，但承擔負債的責任，就轉嫁咗去內銀的股東身上，若然自問做唔到「犧牲小我完成大我」，就咪自投羅網做內銀小股東！

昨日提及的光控（00165）升2.4%報16.76元，可續坐順風車。此外，若睇好中國經濟能軟着陸，則大型綜合企業復星國際（00656）亦好值得實力投資者注視。

復星從事產銷藥品、房地產開發、產銷鋼鐵產品、開採及加工各金屬礦藏，以及資本管理、營運和投資保險業務等。去年公司純利80億元人民幣，按年增長17%。

本來呢隻係不折不扣基金愛股，可惜一次高管失聯事件震散股價，雖然之後高管安然無恙，但芬佬一朝被蛇咬，清倉了唔敢再搞，所以見到隻股依家估值仲係平。

若然睇好內地經濟觸底回穩，其實復星現價值博率吸引，可在10至11元水平分注收集，首站目標發力向上回補去年十月的下跌裂口位12.22至13.28元，回吐主要支持在9.3至9.5元水平。

順帶一提，今日內地將公布首季GDP數據，內地傳媒昨已放風，話市場預期首季GDP會由去年末季的6.8%略為放緩至6.7%。若數據符合預期，對市場影響應屬中性。再看三月外貿數據及股市氣氛，預計次季表現可勝首季，故對後市看法暫毋須過於悲觀。

司慕渢