Market Insight：長汽隨時踩油開車

今年環球股市如同坐過山車一樣，年初開局大插水，對需求預期悲觀，國際油價落到26美元。正當個個以為股市末日，大摩更唱淡話恒指年底見16,500點。

結果大宗商品拗腰大反彈，基金在現金水平逼近十五年新高之際，把個股挾到九彩，尤其近幾日，IMF上調中國經濟增長預測，中國三月製造業PMI、PPI優於預期，外貿數字初見改善，自一四年第四季，人民銀行由定向放水，推演到全面放水強托經濟後，終於逐漸見到效果。

芬佬現金多焗買貨

無論你信唔信內地的數據都好，一班嚴重缺貨的芬佬正如熱鍋上的螞蟻，已經唔追唔得。到底恐慌性補倉完未？萬一周日油組會議有意想不到結果，真係聯手托市的話，大宗商品再升，恐怕股市隨時爆多一段上去都唔出奇。

昨日港股開波個多小時之後，指數好似點咗穴一樣，恒指波幅不足一百點，個個搵緊有咩可以落鑊，基金經理慣性的逆向操作，第一時間自然同幾間借貨行收風，搵吓街外累積沽空夠多的股份埋手。

國際銀行股、資源、金屬及基建等板塊都先後挾爆，三月底之前，比淡友踩得幾深吓的聯想集團（00992），過去幾日都有明顯補空倉手影，走勢上，連串三條平均線，睇吓今浪可唔可以返到7.5元水平。

之前講過，幾間大行一早放風，話三月內地汽車銷售唔錯，早幾日公布按年升8.8%，增幅對辦。汽車股在大市爆升前，已率先一輪衝鋒，昨日個市靜返落嚟，有實際銷情支持的車股又再發力。華晨汽車（01114）升2.4%，東風集團（00489）升1.1%，但論到交投，點都唔及今浪相對落後的長城汽車（02333），升3.6%收報6.54元。

紓緩銷售結構失衡

長汽備受注目，主要受本月二十五日，旗下SUV車系推出新款，哈弗H7將會在北京車展中登場。唔少分析都話留意到呢款車走高性能路線，極速可以超過二百公里的七座SUV市場反應，假如反應好，隨時為中排量七座SUV在沉悶車市中殺出一條血路。

今年長汽股價表現只算平穩，由年初近9元輾轉跌到4.94元低位，三月初見過7.2元之後，進行橫行整固。事實上，年初銷售表現未算得上火爆，剛公布的三月汽車銷量按年升3.1%至8.35萬輛，首季累積銷售則升5.7%，至23.34萬輛，都在預期之內，沒有太大驚喜。

基於有分析認為，長汽過分側重於H2及H6兩款SUV的銷情，被睇好的H7應市，短期應有沖喜作用，亦有助淡化銷車款結構集中的問題。近幾日成交對辦，一六年PE估計唔夠5倍，若趁消息衝穿三月初高位，有機會衝上7.5至8元。

中港兩地股市做好，內險股繼續追落後，德銀發表報告，預計內地會長期維持低息環境，上調多隻股份的目標價，該行將國壽（02628）及中國太平（00966）列為行業首選，目標價分別為29.9元及30.8元，維持「買入」評級，刺激兩股昨日各升3%。

投資收益係內險的主要收入之一，股市走勢直接影響企業盈利，內地股市去年下半年大插，市場曾擔心內險的投資收益大減，會拖低盈利。

國壽季績仍可看好

不過，一眾內險股減磅得早，去年業績表現仍然不俗。國壽去年純利347億元人仔，按年增長7.7%，而今年頭兩個月的保費收入有1,587億元人仔，按年上升38%，表現唔錯。集團將於本月底公布首季業績，預計增長勢頭得以延續。

走勢上，國壽股價由二月開始在17至19元區間上落，現已連升五日，呈小圓底回升，昨日成交急增至25.5億元，短線阻力100日線21.1元，若大市氣氛持續改善，有望上破阻力。另外，中國太平昨日亦公布咗附屬太平人壽、太平財險及太平養老險今年首季的保費收入，合共482.52億元人仔，按年增長18.6%，業務保持穩定增長。

此外，中保監最近印發《保險集團併表監管統計制度》，要求各保險企業定期上報全口徑的資產負債表和利潤表，在下認為此將有助推動行業長遠健康發展。

古勝