絲絲講場：葉茂林慶生同員工鬥Surprise
耀才證券（01428）員工尋日神神秘秘為老闆葉茂林搞咗個生日會，葉老闆開心到畀番個Surprise出嚟，即場公布豪派30萬元利是畀所有員工！
豪派利是三十萬
連提早退休歎世界嘅CEO陳啟峰，都送咗個牛形琉璃藝術品畀葉茂林，祝佢啲股「牛氣沖天」咁話喎。
阿葉老闆其實連自己生日都唔記得，見員工為佢搞生日會又送禮物，幾咁感動，於是即場宣布豪派利是30萬元。
佢咁豪，原來仲有個原因，就係近期個市回勇，葉老闆早排投資大獲全勝所以派錢。佢定今年公司盈利目標亦一樣好豪氣，就係4億元！佢仲講明「3.9億都唔收貨」咁話。