做生意有格睇，尋日上集講到5種做生意命。（錯過咗？唔驚，可以Click入去「on.cc東網」網站或東網手機App睇番），今日到下集，係唔係天生打工命？一樣有得睇，以下呢6種人就千祈咪做生意。
呢個世界有人做揸Fit人，亦有人心甘情願齋收Order做事。如果鍾意成世人畀人點住做嘢，就千祈唔好諗住出嚟搞生意，唔啱你。
因為創業就係搵人幫自己實現夢想。不過，「幫人達成夢想」是否真係你嘅夢想？定只係你未諗自己有乜夢想？
做生意自己做老闆唔使捱？咪傻啦。做老闆先至無得收工，無時無刻都係工作中。做生意嘅滿足感絕對唔係來自舒服，唔想辛苦就打工啦！
美國《財富》雜誌分析，專搞搞震嘅細路最大機會係未來老闆，事關佢哋唔怕打破規矩。若果你細時係破壞王，分分鐘係生意奇才。
覺得世界唔夠好，先會自己出嚟搞。好似搞過N瓣嘢嘅Tesla老闆馬斯克咁，佢當年就係嫌網購唔夠方便，所以就搞咗個PayPal出嚟造福街坊。
如果已故Apple教主喬布斯甘於同其他人一樣咁諗嘢，就唔會有iPhone。有呢啲瘋狂到以為自己可以改變世界嘅人，個世界先會改變。你又夠唔夠癲先？