絲絲講場：花旗日日郁員工？
今時今日乜都講彈性講流動，連Office都只設流動位，流動位喺外國好興，依家流到嚟香港。
話說花旗香港嘅新Office搬咗去觀塘海濱道One Bay East東座，命名為花旗大樓。新環境新制度，新Office行「Clean Desk Policy」，即是員工枱面要日日清！點解？事關辦公室嘅枱大家共用，每日收工後枱面唔可以有私人物品留低。
私人嘢放Locker
咁私人物品可以放喺邊？唔使擔心，每個花旗員工都有一個Locker（儲物櫃）存放私人物品。
唔單止枱面大家共用，原來連電腦同電話都一樣共用。每個員工用自己個Staff Pin（員工登入密碼），就可以登入唔同樓層嘅電腦同電話。上去開會唔記得印文件？臨時想打個電話？冇問題，一Click Sign In就搞掂！
新大樓 有來頭
話說呢幢花旗大樓樓高21層，佔地51.2萬呎，同隔籬西座Manulife Tower並排。聽講花旗香港依家諗緊想起番個Gym Room，話唔定日後員工可以對住個海做Gym。仲記得，花旗兩年前買呢幢大樓時係一單大刁，作價54.25億元，當時係香港歷來最大宗全幢甲級商廈成交！
聽講，呢種流動位做法，除咗保持整潔外，話仲可以提高員工嘅流動性。