電動汽車龍頭Tesla（特斯拉）嘅車款中，已經有「S」同「X」，仲爭咩？咪爭個「E」囉，合埋剛好一個「SEX」。然而，Tesla剛剛推出嘅新款汽車偏偏叫做Model 3。原因係福特汽車（Ford）一早登記咗「E」系列車款，Tesla惟有用「3」代替。
原來雙方一○年協議咗Tesla唔會用「E」命名，搞到湊唔成「SEX」。舵手馬斯克之前喺股東答問大會都大呻，「福特毀滅咗SEX」。不過新款發布一個禮拜，已有超過32.5萬張訂單。馬斯克可以下番啖氣喇啩。
其實車迷只要從倒後鏡睇，Model 3標誌上嘅「3」，望落都似個「E」字嘅。
余絲韻