絲絲講場：電訊雙雄年報各「字」玩嘢

三大中資電訊股中，中電信（00728）同埋聯通聯通（00762）「雙雄」近日先後上載咗各自嘅去年度年報！仲好夾咁，喺年報嘅封面擺咗超創新嘅字句。聯通用精簡「reboot」一個英文字去表達佢革新嘅決心，中電信就用「喚新、換新、煥新」，同大家玩食字，又吊吓大家癮，畀大家估吓佢有咩新搞作，真夠意思！

咁中國移動（00941）又點？去年昨天，中移出咗一四年年報，上次標語為「我們創造了4G奇蹟（迹）」，如果照辦煮碗，就會被比下去喔。一五年年報遲遲未出，唔通真係度緊個夠爆，夠睇頭嘅標語？

其實，上述三大中資電訊股領導層舊年下半年先啱啱大執位，聯通由中電信前董事長王曉初領導，新任董事長兼首席執行官一職；中移董事長奚國華亦退休，由工信部副部長尚冰接任；中國電信前董事長常小兵又因涉嫌違紀被中紀委調查而辭職，由楊杰任代行董事長以及首席執行官職權。

大家都期待，新官上任會有一番勵精圖治！以上兩本年報或者可以露端倪！

另外，講開年報，股民自不然會關注吓管理層舊年（手豆）咗幾多薪酬。聯通一五年年度盈利為105.62億元（人民幣‧下同），按年跌咗12.38%。中電信一五年年度盈利200.54億元，按年跌13.43%。

咁由中電信跳到聯通嘅王曉初薪酬又點？截至舊年八月廿四日佢離任計，佢呢8個幾月喺中電信攞到嘅薪津係11.1萬元，仲少過一四年半年既17萬元，真係大縮水！去到聯通又點？由舊年九月一日計到年尾，佢嘅薪津係6.4萬元，同喺中電信差唔多！

余絲韻