絲絲講場：盈健模型診所五臟俱全
喺香港擁有多間診所嘅盈健醫療（01419）尋日掛牌上市，公司送畀港交所（00388）嘅紀念品（圖），引死唔少模型發燒友。
有齊全科專科牙科儀器
份紀念品就係一個診所模型，佢雖然「的骰」，但就乜都有齊！首席醫務總監彭麗嫦醫生話，個模型有三間房，每一間房都有唔同嘅擺設，代表集團全科、專科同牙科三線發展咁話。「專科房會有迷你X光儀器，牙科房就有牙科診所專有嘅牙醫床。」何止模型發燒友，連絲絲見到都兩眼發光。
盈健尋日開市無耐就升穿1.9元高招股價近4成，主席陳健平就好開心，一班醫生仲歡呼拍手添，呢個場面真係好少見！
余絲韻