絲絲講場：喬布斯曾遭搞喊4次
尋日係Apple嘅40歲生日，絲絲又諗起佢哋前教主喬布斯，佢追求完美到幾乎唔理人感受，就係人都知，以為佢無乜感情無乜感覺？估錯晒，佢原來會喺公司做大喊包，仲唔止一次，畀人見到嘅至少有四次。嗰四次為乜呢？
有兩次關拍檔事
第一次，就係畀同佢一齊創辦Apple、一齊喺車房嵌機嘅拍檔沃茲尼亞克……個老竇搞喊！事關Uncle認為自己阿仔負責工程，貢獻大過搞推銷嘅喬布斯，所以叫阿仔擸多啲Apple股權。
第二次又係關沃茲尼亞克事，事關當年職員證上嘅「1號」畀沃茲尼亞克攞咗，教主即刻喊出嚟。雖然之後畀教主爭取到「0號」，可惜出糧時銀行唔接受「0號」，要變番「2號」，教主始終係「二奶」命。
為iMac嬲到喊
第三次，八五年教主畀自己親手招攬入公司做CEO嘅斯考利逼宮離開Apple，經典「反骨」橋段唔使多講。
第四次，發現個iMac Team搞咗個彈出嚟嘅CD Tray出嚟，而唔係型仔簡約嘅CD Slot，教主嬲到喊。話時話，第四次呢吓，絲絲明，好明。
余絲韻