早排恒指冧到跌穿萬九點，點知上星期尾又升番，大家又開始諗是否「真‧好轉」？好、淡友衝突即刻激化，呢邊做緊好倉，嗰邊夾淡倉，絕對唔係你死就我亡，難免多咗唔少對頭人。點搞？連班股壇口痕友都話，唔爭在趁今日驚蟄，約埋去灣仔鵝頸橋「打小人」。講到「小人」，職場唔少，以下10種Office毒人，認實佢哋、遠離佢哋，咁就慳番唔使幫襯鵝頸橋。
是非精屬「小人」榜首。講是非，無聊兼傷人。
睇過《哈利波特》就知，催狂魔（Dementor）一出，人就至剩下最恐怖嘅回憶。催狂魔即係嗰啲只係得悲觀同悲觀同悲觀嘅人，佢哋負面氣場犀利到，一在場，成間房都生無可戀。
佢哋冇控制情緒能力，向你發脾氣，仲要賴咁躁都係因為你。唔好再畀佢哋當做情緒廁所，乜都發洩落你度。
佢哋咩都唔抵得人，總之「隔籬飯香」，硬是覺得人哋有嘅一定好過自己。
初時覺佢哋慘，慢慢你就知，佢哋原來係無病嘅「長期病患者」，一味自怨自艾，少少嘢都向你呻、搵你陪。
佢哋至叻打住Friend牌嚟吸光你啲精力與時間，另一方面又因為清楚你喜好，好識氹住你、吊住你條命仔，小心終有日佢會食咗你。
佢哋最叻就係彈你鍾意或你認為啱嘅嘢，佢哋認為世上只有自己先係正宗，所有同佢哋唔同嘅人與事，一概唔係嘢。
呢類人一般朋友唔多個。若你發現識咗佢之後，社交圈子愈嚟愈細，好似得番你同佢相依為命咁？擺明你中咗伏，分分鐘連你都只不過係佢用嚟增加自信嘅工具。
同佢哋溝通？絕對係浪費時間，事關佢哋對任何嘢都視為係挑戰緊佢。
簡單講就係「黑心」。佢哋嘅快樂建築喺你嘅痛苦上，唔係Hurt你就係想攞你着數，除此之外對你零興趣。不過好處係，一眼就認得出佢哋。
余絲韻