絲絲講場：張華峰露兩手發新年財

邊位？就係立法會議員張華峰。佢見呢排個市死吓死吓，初四開市時更再插多七百幾點，經驗話佢知股市應該會「死貓彈」，故當日以162.7元低撈港交所。嗱，尋日個市果然反彈，佢諗都唔使諗就以168.2元即沽港交所，短短兩日就每股賺成5.5元！

揸期指港交所速賺

肥老闆張華峰初四究竟入咗幾多手港交所？雖則佢冇講，但肥老闆出手點會低，若買咗100手（即1萬股，都係使大概百六萬蚊）計，就輕易賺咗5.5萬元；如果佢出手再勁啲，買咗1,000手（即10萬股），就更加係執咗55萬元！

唔止港交所，肥老闆原來早兩日仲揸咗期指，見股市反彈，期指賺咗400點就急急鬆人。今個新年肥老闆好肥啊！

近排個市弱過藥煲，點解佢仲咁夠薑夠膽入市呢？

轉身快 睇死未見底

肥老闆話當個個諗住個市就嚟死時，應該就係反彈嘅時候；同時，當啲大戶頻頻出嚟講嘢話個市會大跌時，就好可能係出口術，又係一個入市信號！

不過，佢講到明自己唔係睇好個市，個市仍然未見底，只係技術反彈，故趁有水位即刻走貨，袋袋平安。佢覺得個市起碼要等下月兩會開始，政策陸續出台後，下半年至會稍為好轉。

佢仲袋錢入大家袋，直言自己呢啲係炒家行為，今年個市超級大波動，散戶唔好亂跟風。

至於舊伙記林家亨，早前過檔恒發金融，近日恒發洋參（00911）新聞多多，肥佬又冇關心吓前伙記？佢話林家亨新年假期去咗上海，應該好輕鬆。

余絲韻