北水頭等倉:鞍鋼短炒具值博率

與去年中A股股災相距才半年,一六年元月中證監再搞出個大頭佛,有人祭旗係合情合理的要求吧!眼見人禍頻臨魚缸,股民氣憤難平絕對理解,再唔正視問題,只怕老外全被嚇跑兼不再回頭。

互聯互通未見其利先見其弊,A股停市期間港股沽壓明顯增加,真係多得佢唔少。唔少股份見嚴重超賣,奈何如今股民持貨信心低迷,亦唔知道內地財金部門行事會唔會再為市場添亂,無論大、小投資者都選擇離場觀望。

資源行業加快整合

近期人民幣貶值是在市場預期之內,但經歷了去年「突貶」後反彈乏力一役,今次博反彈的意欲就更低迷。

雖然人民幣貶值會令中資股估值添壓,而呢幾年借了唔少美元債的中企,亦要盡快調整債務組合以鎖定匯兌風險,但不能抹殺的是,人民幣在可控範圍內貶值,有助扶內地製造業一把,至於作用有幾大,須視乎全球市場需求情況。

今年中央要鐵腕解決產能過剩問題,大型煤企及鋼企應該是行業加快整合的得益者。上周見到煤炭股及鋼鐵股有資金流入,馬鋼(00323)、鞍鋼(00347)分別上升7.6%及8.6%,兗煤(01171)、神華(01088)及中煤(01898)升幅介乎3至4%。

鞍鋼上周五收報3.38元,觀其走勢圖,上周10日線重越50日線,且上周四股價跟跌市走低成交縮減,但上周五股價反彈成交卻明顯增加,值得關注。趁有勢小注跟炒,是浪目標先上試3.6至3.7元阻力位,失守3.1元止蝕。

至於煤炭股,論人氣最旺要算是龍頭股神華,上周五收報11.52元,成交總算似番啲樣,技術上14日RSI現背馳,短線人氣維持的話,有一定值博率,目標反覆上試13元阻力區,失守10.9元止蝕。

司慕渢