絲絲講場：股神發達三寶 你我起碼中一樣
有人問股神巴菲特「點解你咁有錢？」股神又竟然真係答，話皆因自己有三樣嘢。畀定個心理準備你，股神發達嗰三寶，有兩樣你冇。
第一樣，就係生於滿地機會嘅美國。睇緊呢段嘢嘅你，怕且都唔係生於或身處美國啩，認命吧。（不過若然閣下真係人在美國都睇《絲絲講場》嘅話，絲絲錫晒你。）
第二樣，大家係未知有冇，就係遺傳基因好，夠長命。股神今年85歲，投資咗大大話話60幾年，佢一向推崇簡單，專注長期投資，至鍾意買低成本嘅指數基金。小數怕長計，講緊60幾年喎。
依靠複息滾大財富
第三樣，終於係大家都可以有嘅，就係複息。意思就係你投資賺到嘅利息，再去賺多啲利息返嚟，時間愈長，投資回報好似雪球咁愈滾愈大。如果加埋長命同埋醒少少嘅投資決定，想唔有錢反而難。
講咗咁耐，股神發達三寶，大家至少都有「複息」一寶；至於長命，就自求多福喇。
余絲韻