孖妹S檔案：半新股未癲完 你玩得起？

增長快 回報超藍籌

黃：輝立証券（香港）董事 黃瑋傑

李：時富金融優越投資服務部副主管 李明正

梁：MoneyCircle股票課程導師 梁帥聰（Clement）

彩兒：啲人成日話新不如舊，唔通去到股場就啱啱會相反？

梁：我每年都會搵啲半新股投資（口架），因為佢哋一般增長較快，搵啱嘅話所得回報比買藍籌好得多。恒指波幅唔係太大，長期都處上落區間，資金好多時都會流去炒作半新股。

Kitty：要新嘅話點解唔索性抽新股，而要買上市咗一段時間嘅半新股呀？

黃：新股一般處成長階段，集資去將業務做大，增長較快，但抽新股較被動，中籤率未必高，佢哋上市表現又會受當時市況影響。若果買半新股，只要覺得估值合理，可以隨時吸納。

彩兒：之不過上年有成百幾隻新股喺香港掛牌，要買中隻會爆升嘅都好難啫。

黃：買嘅話要睇行業有冇獨特性同前景，如果係積弱嘅行業，就算係龍頭都會大打折扣。應該喺好行業中揀龍頭，因為佢哋有較強嘅定價能力。依家市場鍾意新經濟股，創新、研發性強嘅公司都可以睇高一線。

MoneyCircle梁帥聰稱，投資者不要嘗試在股份的招股價附近撈貨。（胡家豪攝）	輝立証券黃瑋傑表示，買新股要看行業的獨特性和前景。（羅錦鴻攝）	時富金融李明正表示，創業板內的半新股波幅大。

題材獨特 唔難炒起

梁：行業好重要，題材比較獨特嘅話都幾唔錯。好似大中華電影技術供應商IMAX CHINA（01970）咁吖，佢有星球大戰上映同中國影視發展呢兩個概念可以炒，市場上又少有同類型公司。我自己第一次留意呢隻股嘅時候，佢喺近40蚊嘅價位。隻股由40蚊一度升到去60蚊呢段時間，我前前後後都炒咗幾次，最靚喺59個幾放，但佢由31蚊一度炒到上60蚊，可能要等一段時間先會再升。另外，若果有特殊板塊當炒，好多時啲影子股都會被炒起，建築板塊就係最明顯嘅例子。

Kitty：佢哋嘅走勢會唔會有路可捉？

黃：有啲股份會喺上市後升一輪，跟住跌番落去，資金喺低位收集一段時間，貨源歸邊之後，隻股就會再升番。好似高偉電子（01415）咁吖，佢係蘋果公司（美股：AAPL）嘅零部件供應商，大家知道蘋果公司手機受歡迎，所以呢隻股一上市就受資金追捧，令估值去到偏高水平，近期智能手機出貨量放慢，拖累佢嘅股價（上市兩個月後）沉番落去。

走勢飄忽 留意禁售

黃：另一類新股上市時，投資氣氛欠佳，加上市場對佢哋嘅業務冇咩認識，股價一嚟就潛水，之後被資金喺低位收集，市場開始發現佢哋嘅優點，引來資金追捧，好似火鳳凰咁，置諸死地而後生，破咗底價再升番，例子有中國綠寶（06183）同環球醫療（02666）。

梁：半新股一係唔升，升嘅話通常會好快，而且好短暫，完咗個升勢就要調整一段時間，好似泰加保險（06161）咁。

Kitty：又係喎，呢隻股由上年一月上市後開始升，短短四個月就升咗三倍有多，但之後又急速打回原形。

梁：仲有呀，新股嘅基礎投資者同大股東都各自有禁售期，通常由半年至一年不等，好多時過咗禁售期，佢哋會想辦法抬高股價，然後先出售股份。

超購破底 避之則吉

彩兒：咁有咩半新股應該要避開？

梁：我唔會炒超額認購嘅股份，因為太熱門嘅股通常之後都表現得唔好，我會搵一啲上市時認購不足嘅半新股，佢哋嘅散戶參與度低，股權會較集中，較易被炒起；以招股價區間下限定價嘅股份反而有優勢，可以吸引我呢啲投機者。

黃：新股跌破招股價亦係好棹忌，就算基本因素幾好，如果跌破招股價，好似中再保（01508）咁，會有好多蟹貨，買咗就要諗係咪要止蝕。

梁：唔好嘗試喺招股價附近撈股票，因為一穿就冇咩位守，到時你更加唔會止蝕，從歷史嚟睇，呢啲股份可以浮番上水面嘅機會好低。

創板勿貪 有賺就走

彩兒：上年多咗好多創業板股份配售上市，佢哋嘅升幅真係高到嚇死人。年內五隻升幅最高嘅半新股都係呢啲創業板股份，幅度高達逾十倍。

李：呢類股份股權集中，要預波幅會好大，可以一日升三至四倍，之後跌五至六成，買嘅話要控制注碼，最好揀一啲升跌幅唔太明顯、未有動作嘅股份，已經升咗嗰啲就唔好再買喇。好多散戶買呢啲8字頭股，都鍾意用技術分析，但其實根本冇用，佢哋一開始就已經估值過高，所以都唔使睇估值，買落去都係博佢升，最緊要唔好貪心，有賺就走。

圍繞國策打穩陣波

彩兒：咁嚟緊又有邊啲半新股可以考慮？

黃：我較睇好中奧到家（01538），佢同彩生活（01778）及中海物業（02669）都係做物業管理，但估值係三者之中最平，中國有愈來愈多大型物業落成，對物業管理需求穩定。另一隻就係福萊特玻璃（06865），佢係全球最大嘅光伏玻璃製造商，估值比同類型公司信義光能（00968）平得多。兩隻股今年應有三至四成升幅。

維珍妮華融有得諗

梁：我啱啱走咗隻現代牙科（03600），佢之前炒高過兩、三日，依家或者會跌落去4蚊嘅低位，我會等佢股價企穩返先再睇。佢經營假牙生意，行業獨特，所以我會再觀察。仲有維珍妮（02199），因佢喺越南設廠，同跨太平洋戰略經濟夥伴關係協議（TPP）呢個大主題可以扯上關係，同埋佢由上市以來一直處上升趨勢。

李：我會睇好中國華融（02799），佢係中國信達（01359）以外另一間專收購不良資產嘅公司，受國策支持，加上內地仍有減息空間，可減低企業債務壓力，令華融嘅資產安全咗，佢嘅投資回報率（ROI）又高，係一個唔錯嘅生意。我亦覺得聯想控股（03396）係一隻被低估嘅股票，佢持有好多唔同生意，是但一個跑出，分拆出嚟嘅機會都高，有望被重新估值。

彩兒、Kitty

若有料報畀彩兒同Kitty或有嘢問，可電郵money.biz@on.cc