Market Insight：鋼鐵股投機跟進

恒指昨日升210點，收報22,040點，愈玩愈靜局，恒指波幅指數跌6.2%落到19.19，是近五個月新低。全日有近千隻股票向上，若唔睇成交金額一欄，肯定以為昨日好好環境。藍籌中，電訊、石油、內房及內銀統統反彈，話時話，昨日粉飾櫥窗味道都幾濃。

聖誕假期前夕，炒家懶理濠江酒店房劈價潮，濠賭股「周期性」炒上，金沙（01928）及銀娛（00027）分別升2.5%及1.2%。個市繼續炒中國放水，資金有迹象由一線內房股流向冷門之選，新世界中國（00917）、中海宏洋（00081）及綠地（00337）交投異動，升幅3.2至6.1%。

彭博向18位經濟學家進行問卷調查，預示在今年餘下幾日，人行好可能再出招，下調存款準備金率50點子，將法定存款準備金率由17.5%降至17%。今年計落仲有三個交易日，加兩個半日市，如果班專家無估錯，純粹Buy on rumor sell on fact，賭佢幾日又真係諗得過，古勝心水仲係早幾日推介的幾隻主打深圳項目內房股。

鑊氣唔夠 炒嚟嘥氣

《中醫藥法（草案）》提交全國人大常委會審議，草案假如獲表決通過，中國將誕生第一部為傳統中醫藥行業制訂的國家法律，規範中醫藥發展，引入中醫師及診所准入、中藥管理及人才培養等制度。昨日A股內醫藥產業股升到爆燈，香港呢邊，見鑊氣得幾隻，中國中藥（00570）升6.5%，泰凌醫藥（01011）升5.5%，同仁堂科技（01666）亦升4.5%。

內地口痕友睇見二孩政策炒唔起乳業股，股市氣氛完全同中醫藥法無得比，笑言年底「飲奶不如食藥」。中醫藥法加入規範，會唔會對同仁堂一類老牌龍頭有好處，真係要等時間證明。資金的取向明顯仲係有名牌效應，好似同中國中藥一樣在內地寡頭壟斷產業中藥顆粒的半新股培力（01498），完全無鑊氣，升得0.2%收4.16元，自顧自潛泳，講到底，無成交配合都係嘥氣。

體育用品股經歷幾年的去庫存期，營收大都重拾正軌，昨日見首三季純利升三成六的寶勝國際（03813），股價創52周高，同港股下半年死吓死吓市況相比，精壯到暈，但計落一五年20倍PE左右，一六年14.8倍，已經唔算好平，反而寶勝阿媽，波鞋代工王裕元（00551）受忽視的程度，惹起在下興趣。

裕元明顯過分低估

預期人仔持續貶值，全球大宗商品急挫後，原材料價格低企，美國消費市場持續復甦，數埋一大堆理由支持，偏偏股價就係唔行，年初至今跌8.7%，同寶勝132%升幅一比，相形見絀。最慘係無缺點外，業績復甦早就寫響成績表上，首三季盈利2.85億美元，等於舊年全年八成六，一五、一六年PE為12.4及10.9倍，慷慨派送往績，估計息率有4.6厘樓上，斷估股價現水平點都死唔去，依家只等大孖沙資金進場。

日前閉幕的中央經濟工作會議其中一個重點是去產能，雖然此為老調重彈又重彈，但今次可望有較強的執行力。事實上，內地大型銅廠和鋁廠均已協議減產，在需求下降之下，在供應鏈方面着手是最佳解救方法。

金屬股昨應聲彈起，鞍鋼（00347）升6.8%，馬鋼（00323）升3.7%，中鋁（02600）升4%，但相關A股卻悉數下跌，中港投資者再次顯出視野不同。美國擬對中國出口耐蝕鋼徵收256%關稅是鋼鐵A股下跌的原因，內地鋼鐵今年出口量達1億噸創歷史紀錄，顯示內地產能過剩須靠出口去消化。當然，去產能並非話cut就cut，遠水不能救近火。不過，美元自聯儲局加息後反而回軟，造就國際金屬價格回升。

商品價格易跌難升

鞍鋼連升三日，但相對四、五月高位現仍不及一半，鋼鐵行業向來是產能過剩最嚴重行業，今年首十個月大中型鋼鐵企業有接近一半虧損，鞍鋼首九個月亦虧損10.43億元人仔。

雖然現價較帳面值折讓超過50%，但美元偏軟之勢有機會隨下次加息預期升溫而扭轉，商品價未來易跌難升，中國經濟明年下行壓力更重，房地產開發投資可能由微增長變收縮狀況，除非行業去產能方面有突破進展，該板塊短期只宜投機博反彈，中長線則宜抱觀望態度。

古勝