絲絲講場:雷賢達助學 捐「千年」茶餅

「基金教父」雷賢達講股市就聽得多,佢仲每個星期開班教英文,你又知冇?除咗金融界外,佢仲同好多中學校長同教育局官員好熟。搞乜?

受太太多年做義工感染,最近佢都做埋一份,幫基層中學生補習英文;佢仲趁聖誕佳節捐出千年古樹普洱茶餅義賣,幫香港學生輔助會兒童發展基金籌款添。

屋企教讀英文

雷賢達畀咗疊基層學生作文絲絲睇,啲同學仔好有理想,想做飛機師、律師咁。

雷賢達教啲同學仔朗讀英文同睇國際性英文報刊,希望幫佢哋增廣見聞,等佢哋個個好似美國總統奧巴馬咁有自信。依家每星期有六至十二個同學仔去佢屋企,跟佢同太太補習英文,佢太太仲好叻,教小朋友做麵粉花添。

佢又戥香港學生慘,畀人「死谷」做功課,玩都無得玩,無晒興趣睇書。佢話自己七十年代留學,寄宿學校每日有兩粒鐘時間可以踢波High Tea,學校好重視全人發展,所以好多投行都鍾意請外國畢業生。

余絲韻