絲絲講場：魔化字典教你睇穿金融邪惡
平安夜，送魔鬼大禮。同一個字，喺金融世界有另一種解法，事關經濟師、分析師唔係普通人，佢哋講嘅唔係人話。唔想做普通人？嗱，呢度有本財經專欄作家Jason Zweig嘅《魔鬼金融字典》，先嚟教你曲解10個華爾街用字。袋住落袋，隨便執出嚟露兩手，好似Pro咗，型晒，爛Gag慳番。
央行（Central Bank）
一班就算次次睇錯市、都仲以為自己預測好準嘅經濟師；佢哋即使已經衰過好多鑊，都仲信自己嘅政策好使得；佢哋連上次通脹都搞唔掂，但就以為自己今次可以阻止到；佢哋話嚟緊有法子推低失業率，但實情之前搞到多咗好多人失業嘅，咪又係佢哋……
考吓你，央行官員同風向標同樣隨住風轉，咁兩者有咩唔同？就咁嘅，只有央行官員先會覺得，個風點吹係由佢嚟決定。
明確地（Clearly）
正解係「唔清唔錯」。分析師同權威人士常會用到呢個詞，純粹係（1）扮識，吹水唔抹嘴，亂噏當秘笈；或（2）講緊啲已經發生咗嘅，馬後炮。
經濟學家（Economist）
指嗰啲喺象牙塔頂度研究現實世界嘅大學教授，佢哋嘅結論得一個，就係人類、商品、金錢之間嘅互動，幾雜亂無章都好，都實符合佢哋每一位自己嗰套理論。
預測（Forecasting）
以量度啲無關嘅嘢，去預計啲唔可能知嘅嘢嘅做法；係華爾街請得最多人做嘅工種。
監管者（Regulator）
一啲專用雞毛掃「Fit」啲大笨象、唔畀啲大笨象橫衝直撞嘅官員。佢哋亦係銀行、對沖基金、經紀行、投資管理公司嘅準僱員。
無理性（Irrational）
一個用嚟形容其他投資者、但就點都唔會用喺自己身上嘅形容詞。
研究（Research）
將金融由靠估搞到睇嚟好似好科學嘅一種藝術，通常每年都會食咗投資者資產總值嘅1%。
「基礎研究」（Fundamental Research）就係，扮晒喺度研究啲資產長線盈虧背後嘅供求關係，但實情係成副心機喺度睇實個市嘅短期波動。「技術研究」（Technical Research）就係，全日望實啲彎彎曲曲嘅線。
股市（Stock Market）
一竇數以百萬盲樁樁嘅人，齊齊畀好貴咁買希望，好孤寒咁買價值。
技術分析（Technical Analysis）
靠睇資產舊價格去預測未來價格嘅方法，可靠程度同靠睇尋日天氣去預測明日天氣一樣。
股價走勢何其多，所以要盡力用啲千祈唔好睇得明嘅術語，好似「興登堡凶兆」、「斐波那契回調」、「Guppy複合移動平均線」、「陽轉三文治」、「裂口雙鴉」呢類咁。仲有個準則，就係個術語愈深奧，形容緊嘅嘢愈賺唔到錢。
節儉（Thrift）
使得少過賺到嘅。一個被淘汰嘅習俗，以前係美德，今日被指係令人不安嘅失常行為。
余絲韻