絲絲講場：現代牙科兩家人冇「牙齒印」
上市公司家族同姓都未必完全和諧，如果好似等掛牌嘅新股現代牙科（03600）咁，一間公司兩個姓又會點？
現代牙科入面有陳同魏兩家。主席陳冠峰、副主席陳冠斌（陳主席嘅弟弟）、執董陳奕朗（Ronald，陳副主席位公子）、營銷總監陳奕茹（Edith，陳副主席位千金），呢四位陳氏上市後合共持股46.81%；至於行政總裁魏聖堅同佢位公子兼執董魏志豪上市後就共持股15.6%。
恕絲絲細個時受電視劇荼毒至深，咁兩個家族一齊有冇恩恩怨怨先？Edith話「冇咁嘅事」，佢話大家都係成年人，做嘅嘢都係為公司好。
打屋企工冇得放鬆
公司前身由陳冠斌創立，之後阿哥陳冠峰加入，佢兩兄弟同魏聖堅又係世交，所以一齊搞。同樣因為世交，仲搵埋大家樂（00341）主席陳裕光做非執董。
話時話，二代打屋企工好爽？Edith話因為係自己公司更睇緊啲，連放假都唔敢，今個聖誕兩兄妹忙住上市，去邊度玩？諗都冇諗過。
余絲韻